Premer-mınıstr orynbasarlarynyń az bolǵany jón - Elbasy

Memleket basshysy sońǵy kadrlyq ózgeristerdiń mənin túsindirdi. Nazarbaevtyń bul məsele jónindegi sózi Aqordanyń resmı saıtynda jarııalandy. "Úkimettiń keńeıtilgen óte mańyzdy jıyny ótti. Oǵan ákimder de qatysty. Úkimet músheleriniń sózinde de, meniń qorytyndy sózimde de 2016 jyldyń qorytyndysy jasalyp, barlyq jaǵdaı egjeı-tegjeıli talqylandy. Jyldyń basynan beri jasalyp jatqan sharýalar barshaǵa belgili. Eki úlken másele bar. Birinshisi – saıası reformalar: Konstıtýsııaǵa ózgerister engizý. Ekinshisi – «Qazaqstannyń úshinshi jańǵyrýy» atty joldaý. Osyǵan baılanysty habardar eteıin degenim – kadr máselesi boıynsha biraz ózgerister jasadyq. «Báıterek» ujymynda jasalǵan tekseris qorytyndysy boıynsha Ulttyq ekonomıka mınıstri Bıshimbaev qyzmetten bosatyldy. Onyń ornyna Tımýr Súleımenov mınıstr bolyp taǵaıyndaldy. Ol – saýatty, tájirıbesi mol azamat, Máskeýde jumys istep keldi. Aldynda sol mınıstrlikte orynbasar bolǵan. Daıyndyǵy jaqsy dep, oǵan senim artamyz. Ekinshiden, eki mınıstrlikti bólip, Densaýlyq saqtaý mınıstrligin jeke qurǵan sebebimiz – bul saladaǵy saqtandyrý máselesine baılanysty kóp jumys bar. Halyqqa sony túsindirip, iske asyrý kerek. Sebebi, bul – halyqqa jáne densaýlyq saqtaý júıesine óte qajet másele. Amerıkada oqyp kelip, Nazarbaev Ýnıversıtetinde jumys istegen Eljan Birtanov mınıstr qyzmetine taǵaıyndaldy. Ol sol mınıstrlikte orynbasar bolǵan. Jumysty atqara alady dep senemin. Úshinshiden, Qazaqstannyń Reseıdegi elshisin taǵaıyndadym. Ol – Imanǵalı Tasmaǵambetov. Birinshiden, Reseı – biz úshin kórshi ári áriptes, ekonomıka men saıası turǵydan óte jaqyn memleket. Ol jerge óte bedeldi, tájirıbeli, salmaqty, Qazaqstan men Reseı arasyndaǵy jaǵdaıdy biletin tulǵa qajet bolǵannan keıin osyndaı sheshim qabyldadym. Ekinshiden, Tasmaǵambetovtiń qalaýy solaı boldy. Oıy men tilegin eskerip, eki jaǵynan da saı keletin bolǵandyqtan, ony sol qyzmetke taǵaıyndadym. Premer-Mınıstr orynbasarlarynyń az bolǵany jón, mınıstrler óz sharýasyn atqarýy kerek. Eshkimge siltemeı, eshkimge súıenbeı, bergen máseleni sheship, ózderi jaýap berýi kerek. Mine, men osy máseleler jóninde aıtaıyn degen edim", - dedi Memleket basshysy.