Búgin Aıagóz aýdanynda Qazaqstan Respýblıkasynyń eresekter arasynda búrkitshilerdiń HI respýblıkalyq chempıonaty bastaldy. Eki kúnge sozylatyn qusbegilerdiń saıysyna elimizdiń 9 oblysy men 1 qalasynan 39 búrkit pen 6 qarshyǵa, uzyn sany 45 qus ákelingen.
Aıta keteıik, buǵan deıingi el chempıonattarynda mundaı kórsetkish tirkelmegen.
«Bul – rekord. Tamasha nátıje. Budan burynǵy birinshilikterde búrkitshiler sany 30-dan aspaıtyn. Babalarymyzdan qalǵan ulttyq ónerdiń jyl saıyn qanat jaıyp kele jatqany qýantady» deıdi dúbirli dodany uıymdastyrýshylardyń biri Táttimbet Kápuly.
Osymen ekinshi jyl qatarynan Shyǵys Qazaqstanda ótkizilip otyrǵan búrkitshiler básekesiniń alǵashqy kúninde qyrannyń babyn baıqaıtyn qusty qolǵa shaqyrý, erkin ushyrý, shyrǵa salý sekildi saıystar ótkizilip, jınalǵan jurttyń delebesin qozdyrdy. Naǵyz qyzyq erteń, jarystyń ekinshi kúninde bolatyn sekildi. Sebebi, búrkitter men qarshyǵalardy bul kúni qoıan men túlkige, tipti qasqyrǵa túsirý josparlanyp otyr.
Aıagóz qalasynyń irgesindegi atshabarda shymyldyǵy túrilgen saıatshylar saıysyna Ulttyq sport túrleri qaýymdastyǵynyń birinshi vıse-prezıdenti Erlen Ospanov, ulttyq sporttan memlekettik jattyqtyrýshy Ramazan Sáttibaev, Almaty oblysynyń «Qyran» federasııasynyń dırektory Baǵdat Múptekeqyzy qurmetti qonaq retinde qatysty. Belgili ánshi Toqtar Serikov te týǵan jerindegi tartysty kórýge Almatydan otbasymen birge arnaıy kelipti.
«Aıagózde salbýryn bolady, búrkitshiler saıysy ótedi degende úıde jata almadym, salyp uryp jetken jaıym bar. Aıazǵa, boranǵa qaramastan qanshama halyqtyń jınalǵanyn kórip qýanyp otyrmyn. Toǵyzdaǵy ulymdy sonaý Almatydan arnaıy ertip keldim. Búrkitti jaqsy kóredi. «Búrkitshi bolǵym keledi, qarshyǵa alyp ber» deıdi. Qudaı qalasa, ulymdy ultymyzdyń osynaý uly ónerine baýlysam degen oıym bar», – deıdi ánshi.
Saıysqa qatysýshylardyń jas jaǵynan eń úlkeni – Almaty oblysynyń Sarqan qalasynan kelgen 75 jastaǵy Tálimbek Aısabekuly aqsaqal. Eń jasy – Jambyl oblysy Merki aýdanynyń úmitin úkilep jetken 17 jastaǵy Babajan Baqdáýlet.
(Búrkitshiler saıysy týraly tolyq materıaldy gazetimizdiń aldaǵy sanynan oqıtyn bolasyzdar)
Azamat QASYM, «Egemen Qazaqstan»
Shyǵys Qazaqstan oblysy
Sýretter avtordiki
