Tapsyrmalar tııanaqtaldy

Úkimet Elbasynyń synynan qorytyndy shyǵarýǵa kiristi Premer-Mınıstr Baqytjan Saǵyntaevtyń tóraǵalyǵymen senbide Úkimettiń kezekten tys otyrysy ótti. Onda keńeıtilgen otyrysta berilgen Prezıdent tapsyrmalaryn oryndaý máseleleri qaraldy. Eske salsaq, juma kúni Elbasynyń qatysýymen keńeıtilgen otyrys ótip, onda Úkimetke birqatar naqty min­detter qoıylǵan bolatyn. Mine, sol tap­syrmalarǵa oraı Úkimet tıisti sheshim­der qabyldap, tıimdi sharalardy qolǵa alýy tıis. Senbidegi shuǵyl jıyn­nyń da syry osynda. Sonymen, Premer-Mınıstr elimiz­degi bıznes-ahýaldy jaqsartý boıyn­sha biraz jumys atqarylǵanyn, alaıda bızneske retteý júktemesi artýyn jal­­ǵastyrǵanyn atap ótti. Bul rette Premer-Mınıstr Ulttyq ekonomıka jáne Ádilet mınıstrlikterine osy máseleni sheshýdi tapsyrdy. Budan ózge, Ulttyq ekonomıka mınıstrligine múd­deli organdarmen jáne «Atameken» UKP-men birge bir aıda barlyq baqylaý-qadaǵalaý fýnksııalaryn aýqymdy tekserýdi aıaqtaý tapsyryldy. «Birinshi kezekte bızneske kóterińki talaptar men ákimshilik kedergilerdi qysqartý qajet. Zańnamalyq aktilerge barlyq qajetti ózgeristerdi aǵymdaǵy jyly qabyldaý kerek», dedi B.Saǵyntaev. Premer-Mınıstr Memleket bas­shy­­sy tarapynan salyq organdaryna kóp syn aıtylǵanyn eske saldy. Osy­ǵan baılanysty B.Saǵyntaev Qarjy mınıstrligi Memlekettik kirister komı­tetiniń bıznesti tekserýdi ońtaılandyrý turǵysyndaǵy jumysyn qaıta qurýdy tapsyrdy. Budan bólek, Premer-Mı­nıstr Bas prokýratýramen birge negizsiz júrgizilgen isterdi bir aı ishinde retteýdi júktedi. Sondaı-aq, Premer-Mı­nıstr Ult­tyq ekonomıka mınıstr­li­gi­­ne múd­deli organdarmen birge jańa Sa­lyq kodeksin ázirleý kezinde ákim­shilen­dirýdi túbegeıli jeńildetýdi jáne ony barynsha qarapaıym etýdi tapsyrdy. «Onyń aldynda biriktiril­gen Salyq jáne kedendik kodeks ázir­leý josparlanǵan bolatyn. Alaıda, Pre­zı­denttiń tapsyrmasyna sáıkes Ult­tyq ekonomıka jáne qarjy mı­nıstrlikterine jeke salyq jáne keden­dik kodeksterdi ázirleý qajet», dedi B.Saǵyntaev. Keńeıtilgen otyrysta aıtylǵan 2018 jyldyń sońyna deıin kásiporyn­dardy jekeshelendirý jumystaryn jedeldetip, aıaqtaý týraly tapsyrma da pysyqtaldy. Úkimet basshysynyń málimdeýinshe, nysandardyń basym bóligi bıyl ótkizilýi tıis. Qarjy mınıstrligi atalǵan jumystyń aı saıynǵy kestesin baqylaýda ustaýy qajet. Budan ózge, Memleket basshysy memlekettik menshik pen kvazımemlekettik sektorda qalatyn nysandardyń tolyq tizimin ázirleýdi tapsyrdy. Osy oraıda, B.Saǵyn­taev Ulttyq ekonomıka mınıstri T.Súleı­menovke Yellow pages rules qaǵı­da­laryna sáıkes kelmeıtin, atalǵan tizim­d­erge kirmeıtin nysandardy joıý­dy tapsyrdy. Bul jumys 1 naý­ryzǵa deıin aıaqtalýy tıis. Úkimet basshysy, sondaı-aq, mem­le­kettik satyp alýlar janyndaǵy otandyq taýarlar úlesin arttyrýdy tapsyrdy. Premer-Mınıstr B.Saǵyn­taev avtokólikter boıynsha orta­lyq­tan­dyrylǵan memlekettik satyp alýlar tetigin engizý otandyq óndirýshilerdiń áleýetin arttyryp, olardyń óndirisin jańǵyrtýǵa múmkindik bergenin aıtyp ótti. «Biz bıylǵy jyly atalǵan jumysty jıhaz ben jeńil ónerkásipte júrgizý jóninde kelisip qoıdyq. Osyǵan uqsas tásildi engizetin salalardyń tizimin ulǵaıtý kerek», dedi B. Saǵyntaev. Osy­ǵan oraı, Investısııalar jáne damý mınıstrligine UKP-men birlesip bir aptada atalǵan másele boıynsha naqty usynystar engizý tapsyryldy. Budan ózge, Qarjy mınıstrligine tıisti memlekettik organdarmen birle­sip, barlyq memlekettik satyp alýlardy júrgizý kezinde otandyq ónimdi paı­dalaný turǵysynan konkýrstyq qujat­tamany tııanaqty túrde tekserý tapsy­ryldy. Budan bólek, B.Saǵyntaev kvazı­memlekettik sektordyń satyp alý jumysyna toqtaldy. Ol bul máselede biryńǵaı saıasattyń joq ekenin aıtyp, bir aptalyq merzimde osy kompanııalarǵa arnalǵan, aıqyndyq pen qoljetimdilik eskerilgen, satyp alýlardyń biryńǵaı erejeleri boıynsha ortaq tásildeme ázirleýdi júktedi. Sonymen qatar, Premer-Mınıstr Investısııalar jáne damý, Qarjy mınıstrlikterine UKP jáne ulttyq holdıngtermen birle­sip, kvazımemlekettik sektor men jer qoı­naýyn paıdalanýshylardy qosyp, tıis­ti derekter bazasyn biriktire oty­ryp, satyp alýlar men óndirýshiler­diń biryń­ǵaı IT-platformasyn qurýdy min­­det­tedi. Sondaı-aq, Investı­sııa­lar jáne damý, Energetıka mınıstr­lik­­terine «Samuryq-Qazyna» qory jáne ákimdermen birlesip, árbir iri kásip­­oryn­men jumys júrgizip, jergi­likti qamtý­dy ulǵaıtý boıynsha maqsat­ty ın­dıkatordy belgileý tapsyryldy. Jumadaǵy keńeıtilgen otyrysta Memleket basshysy tarapynan mem­­lekettik-jeke menshik áriptestigi tetik­terin qoldanýdyń tómen qarqyn­daryna, ásirese, óńirlerge qatysty da syn aıtylǵan bolatyn. Osyǵan baı­lanysty Premer-Mınıstr Ulttyq ekonomıka mınıstrligine bir aıda prosedýralardy odan ári jeńildetý boıynsha jumys júrgizýdi tapsyrdy. Birinshi toqsannyń sońyna deıin túrli salalardaǵy tıptik jobalar tizimin keńeıtý jáne osy másele boıynsha óńirlerge tolyq ádistemelik qoldaý kórsetý tapsyryldy. Úkimet basshysy, sondaı-aq, eksport jáne ımport jónindegi ult­tyq kom­panııalar qurý máselesin pysyqtaýdy júktedi. B.Saǵyntaev Investısııalar jáne damý mınıstrligine salalyq mı­nıstr­­­liktermen jáne ákimdiktermen birge Prezıdent mysalǵa keltirgen 72 nysannyń árqaısysy boıynsha pysyqtaýdy jáne sáıkes sharalar keshenin ázirleýdi tapsyrdy. Son­daı-aq, atalǵan mınıstrlikke múd­deli memlekettik organdarmen, ákimdikter­men jáne Ulttyq palatamen birge jańa jobalardy irikteý boıynsha tıimdi tásilderdi ázirleý tapsyryldy. Budan ózge, Premer-Mınıstr eki apta­lyq merzimde eksport jáne ımport jónin­degi ulttyq kompanııalar qurý boıynsha usynystar engizýdi, sondaı-aq, Syrtqy ister mınıstrligimen birge bizdiń ónimderdiń eksportyn shet el na­ryqtarynda ilgeriletý boıynsha or­taq jospardy ázirlep, bekitýdi tapsyrdy. Premer-Mınıstr densaýlyq saq­taý salasyna qatysty da birqatar máse­lelerdi qozǵap, mınıstrlikke naq­ty tapsyrmalar júktedi. Úkimet bas­shy­synyń aıtýynsha, densaýlyq saq­taý salasynda, birinshi kezekte, uzaq merzimdik negizde otandyq óndirýshiden dári-dármek pen medısınalyq maqsat­taǵy buıymdardy satyp alýdy ulǵaı­tý jóninde tıisti sharalar qabyldaý qajet, sonymen qatar, olardy satyp alý pro­sedýralarynyń aıqyndyǵyn qam­ta­masyz etý kerek. Sonymen qatar, durys baǵa belgileý úshin medısınalyq tehnıkanyń Biryńǵaı nomenklatýrasyn qurý tapsyryldy. Medısınalyq saq­tan­dyrýdyń mindetti júıesin engizýge basa nazar aýdarý qajet. «Bilim berý týraly aıtar bolsaq, jalpy, Prezıdent atalǵan saladaǵy jańa tásilderge qoldaý bildirdi», dedi Úkimet basshysy. Sonymen qatar, Bilim jáne ǵylym mınıstri E.Saǵadıevke ha­lyq arasynda 12 jyldyq bilim berý júıesine aýysý, úshtildilik jáne UBT-nyń jańa júıesi jóninde saýatty túsindirý jumystaryn uıymdastyrý tapsyryldy. Bul jumysqa Aqparat jáne kommýnıkasııalar mınıstrligi de atsalysýy kerektigin basa aıtty. Keńeıtilgen otyrysta keńinen qoz­ǵal­ǵan máseleniń biri memlekettik bıýdjetti ıgerý máselesi bolatyn. Premer-Mınıstr bıýdjet qarajatyn únemdi paıdalaný máselesinde shyǵyn­dardy sapaly jáne birqalypty jospar­laý qajet ekenin atap ótti. Osyǵan baı­lanysty Qarjy mınıstr­ligine mem­lekettik organdar men ákimdikterdiń josparlaryn bekitý kezinde qatań pozısııa ustaný qajettigin aıtty. Dınara BITIKOVA, «Egemen Qazaqstan»