Jerlesterimiz jeńiske jetti

Joǵary hokkeı lıgasynda synǵa túsip jatqan qazaqstandyq qos klýb – О́skemenniń «Torpedosy» men Qaraǵandynyń «Sary­arqasy» kezekti jeńis­terine qol jetkizdi. Shyǵys­qazaqstandyq sheberler óz muz aıdynynda Kras­noıarskiniń «Sokol» komandasyn 3:2 esebimen tize búktirse, qaraǵandylyq hok­keı­shiler Angarskiden kelgen «Ermaktyń» qaqpa­syna jaýapsyz úsh shaıba soqty. О́skemendegi oıynda esepti birinshi bolyp qonaqtardyń oıynshysy Dmıtrıı Polıakov ashty. Budan keıin Vladımır Korotkov, Evgenıı Belýhın jáne Denıs Ignashın qata­rynan úsh shaıba soǵyp, «Torpedony» alǵa shyǵardy. Al matchtyń sońyna taman «Sokoldyń» oıynshysy Aleksandr Repıah bir gol salyp, esep aıyrmashylyǵyn qysqartqanymen, oıyn 3:2 esebimen óskemendikterdiń paıdasyna sheshildi. Qazir «Torpedo» týrnır kestesinde 97 upaımen burynǵysynsha top bastap keledi. Biraq olar ekinshi oryndaǵy SKA-Neva (Sankt-Peterbýrg) komandasynan uzap kete qoıǵan joq. Jalpy sany 45 kezdesýden ótkizgen eki ujymnyń arasyn bir ǵana upaı bólip tur. «Saryarqa» bolsa, «Qaraǵandy Arenanyń» muz aıdynynda Angarskiniń «Ermak» komandasymen ótken oıynda 3:0 esebimen basym túsip, 93 upaımen (45 oıyn) úshinshi satydaǵy ornyn saqtap qaldy. Bul kezdesýde qaraǵandylyqtar sapynan Danııl Erdakov eki márte jáne Ilıa Anto­novskıı bir ret mergendik tanytty. Keshe «Torpedo» О́ske­mende «Ermakpen» kúsh synassa, «Saryarqa» Kras­noıar­skiniń «Sokolyn» óz aıdynynda synaqtan ótkizdi.