Astanada "Ádebıet portalynyń" jańa nusqasy tanystyryldy

Búgin Astana qalasyndaǵy Nazarbaev ýnıversıtetiniń konferens zalynda «Ádebıet portaly» ınternet-jobasy jańa nusqasynyń tanystyrylymy ótti. Is-sharada Aqparat jáne kommýnıkasııalar mınıstri Dáýren Abaev, qoǵam qaıratkeri Myrzataı Joldasbekov, jazýshy Tólen Ábdik, aqyndar Qalqaman Sarın, Qanat Omarov jáne basqa da shyǵarmashylyq adamdary sóz sóılep, tuńǵysh ǵalamtorlyq ádebı jobaǵa sáttilik tiledi. Aqparat jáne kommýnıkasııalar mınıstrligine qarasty «Qazkontent» AQ «Ádebı portaly» - zamanýı aqparattyq tehnologııa jetistigin paıdalana otyryp, qazaq ádebıetin nasıhattaý, oqyrmandar men qalamgerler arasyndaǵy ádebı baılanysty jandandyrý, túrli shyǵarmashylyq is-sharalardy uıymdastyrý júzege asyryp otyrǵan Orta Azııa keńistigindegi tuńǵysh ǵalamtorlyq biregeı ádebı joba. "Bul ádebı portaldyń múmkindigi óte kóp. Tehnologııanyń sońǵy múmkindikterin paıdalana otyryp, tek jazba túrinde ǵana emes, oqyrmandarǵa aýdıo, beıne jazbalar arqyly da qyzmet etedi. Eldiń rýhanııatyn damytýǵa at salysyp jatqan mundaı portaldarǵa memleket tarapynan úlken qoldaý kórsetilýde", - deıdi Aqparat jáne kommýnıkasııalar mınıstri Dáýren Abaev. Dál qazir ádebı portal qorynda 5 myńǵa jýyq elektrondyq kitap bar. Jáne taǵy bir aıtary, bul portalǵa kez-kelgen aqyn-jazýshylar óz eńbekterin salyp, áleýmettik jeli retinde paıdalanyp, óz oqyrmandarymen baılanysa alady. Oralhan DÁÝIT, "Egemen Qazaqstan"