QR Parlamenti Reseıdiń Qazaqstanǵa jerdi qaıtarýy týraly hattamany ratıfıkasııalady

Búgin QR Parlamenti Senatynyń jalpy otyrysynda palata depýtattary «1995 jylǵy 20 qańtardaǵy QR men RF arasyndaǵy Embi polıgonyn paıdalaný jáne jalǵa berý sharttary týraly kelisiminiń jáne 1996 jylǵy 18 qazandaǵy Qazaqstan Úkimeti men Reseı Úkimeti arasyndaǵy Embi synaq polıgonyn jaldaý týraly sharttyń qoldanysyn toqtatý jónindegi sharalar týraly QR men RF arasyndaǵy hattamany ratıfıkasııalaý týraly» zań jobasyn qabyldady, dep habarlaıdy QazAqparat. «Hattamaǵa 2016 jylǵy 20 qazanda Máskeýde qol qoıyldy. Qujatta Embi synaq polıgonyn jaldaý jáne paıdalaný tártibin retteıtin halyqaralyq sharttardyń qoldanysy toqtatylady. Sondaı-aq, Reseıge ýaqytsha paıdalanýǵa berilgen jer telimderin, jyljymaly nemese jyljymaıtyn múlikterdi qabyldaý jónindegi qajetti sharalardy júrgizý kózdelgen», - dedi QR Qorǵanys mınıstriniń orynbasary Oqas Saparov zań jobasy boıynsha baıandamasynda. Qorǵanys mınıstrliniń málimetinshe, polıgonnyń jer ýchaskeleri ary qaraı paıdalaný úshin jaramdy jaǵdaıda. Reseı tarapynan polıgondy paıdalaný boıynsha tıisti mindetterdi oryndaýǵa qatysty shaǵym joq. Polıgondy jaldaýdan shyǵarý aımaqtyq ekonomıkalyq damýǵa qolaıly áser etedi dep kútilýde. Onyń ishinde qaıtarylǵan jerlerde ary qaraı paıdaly qazbalardy barlaý, aýyl sharýashylyǵymen aınalysatyn kásipkerlerdiń, uıymdardyń múddesinde paıdalanylatyny belgili. Sonymen qatar, polıgonnyń ýchaskileri Aqtóbe oblysyndaǵy áleýmettik mańyzy zor ınfraqurylymdyq jobalardyń qurylysy úshin paıdalanylýy múmkin. Budan buryn habarlanǵandaı, atalǵan polıgon ıadrolyq synaq alańy sanatyna jatpaıdy, sondyqtan da turǵyndar men jergilikti bılik organdary tarapyna qandaı da bir aýrýlardyń týyndaýyna baılanysty shaǵymdar túspegen kórinedi.