Shymkentte kólik keptelisin azaıtýdyń jańa jobasy qolǵa alyndy

Keshe oblys ákimi Janseıit Túımebaev Shymkent qalasynda qurylysy júrgizilip jatqan birqatar kóshelerdiń jumysymen tanysyp, jol qurylysyn kesheýildetip  jatqan merdiger mekemelerge syn eskertpe jasady, dep jazady OQO ákiminiń baspasóz qyzmeti.\ Máselen, 2016 jyldyń jaz aıynda qurylysy bastalǵan uzyndyǵy 2,9 shaqyrymdy quraıtyn U.Arǵynbekov kóshesi qurylysynyń nebári 150 metri aıaqtalǵan. Jaýapty merdiger mekeme «ART Qurylys» JShS jol qurylysynyń qalǵan bóligin kúz aılarynda paıdalanýǵa beretinin aıtyp, qurylysqa qolbaılaý bolǵan  51 nysannyń búginde 21-i kelisimin bergenin jetkizdi. Kóshe qurylysynyń baıaýlyǵyna syn aıtqan aımaq basshysy jol qurylysyn aldaǵy  eki aıda aıaqtap, el ıgiligine paıdalanýǵa berýdi tapsyrdy. «Uzyndyǵy nebári 2,9 shaqyrym bolatyn kósheniń qurylysyn kúz aılaryna deıin sozýdyń qajeti joq. Qurylysqa qajetti qarjy tolyǵymen bólindi. Endi kúzge deıin sozbaı eki aıda aıaqtaýdy tapsyramyn. Biz qysqa merzimde qurylys júrgizýdi  túrkııalyq baýyrlarymyzdan úırenýimiz qajet. Eger jumys tolyq aıaqtalsa, qaladaǵy kólik keptelisin meılinshe azaıtýǵa múmkindik týady», - dedi ákim. Munan soń, óńir basshysy «Bekjan» bazary mańynan salynatyn Temirlan tas joly qıylysyndaǵy ótpe joldyń qurylys syzbasymen tanysty.  Jalpy quny 1 mlrd. 737 mln. teńge bolatyn jobanyń qurylys jumystary osy jyly bastalatyn bolady. Atalǵan joba tolyǵymen iske qosylǵanda Tashkent, Túrkistan, Almaty baǵytyndaǵy jol qatynasy rettelip, kólik keptelisi túbegeıli sheshiletin bolady. Sonymen qatar, ákim «Bekjan» saýda ortalyǵy men ondaǵy avtobekettiń jumysymen tanysty. Táýligine 250 avtobýs qabyldaýǵa qaýqarly saparjaıdyń jalpy kólemi 23 myń sharshy metrdi quraıdy. Bul bekette búginde 17 jolaýshy tasmaldaýshy mekeme 5 myńǵa jýyq jolaýshyǵa qyzmet kórsetip otyr. Zamanaýı úlgide qaıta jańǵyrtylǵan «Bekjan» kesheniniń jumysyna oń baǵasyn bergen  oblys ákimi bazar basshylyǵyna otandyq taýar óndirýshiler úshin qajetti saýda qatarlaryn ashý qajettigin aıtty. Sonymen qosa, ákim jaýapty sala basshylaryna qaladaǵy bazarlar sanıtarlyq talapqa saı bolýyn qadaǵalaýdy eskertip, satýshylarǵa tıisti jaǵdaı jasalý kerek ekenin atap ótti.