Jaqııanov IBO belbeýinen ne úshin bas tartty?

WBA (Super) nusqasy boıynsha álem chempıony Janat Jaqııanov IBO belbeýinen ne úshin bas tartqanyn málimdedi. Bul týraly vesti.kz habarlady. «Aldymyzda eki belbeý turdy. Biz alǵashynda tek mańyzdy sanalatyn WBA (Super) belbeýine ǵana jarna tóledik. Al IBO negizgilerdiń qataryna kirmegendikten qosymsha shyǵyndalmaýdy jón sanadyq. Munyń bári jekpe-jektiń aldynda kelisilgen bolatyn», – dedi Jaqııanov. Qazaqstan kásipqoı boks federasııasy da osy jaıtqa qatysty pikir bildirdi. «Janat buǵan deıin EBU (Eýropalyq boks odaǵy) chempıondyq ataǵynan da bas tartqan. Sol kezdegi menedjeri Fıllıp Fondıý bul tıtýldyń esh mańyzy joq ekenin málimdedi. Otandasymyz úshin mańyzdysy WBA belbeýin ıemdený bolatyn. Al IBO artyq shyǵyndy talap etedi. Endi Jaqııanov tek WBA boıynsha jekpe-jekterge kóńil bóle alady. Aıtarlyqtaı eshnárse bolǵan joq. Boksshy men menedjeri ózara kelisimge kelip tıimdi sheshim qabyldady», – dedi Qazaqstan kásipqoı boks federasııasynyń vıse-prezıdenti Vıktor Demıanenko. Qazir IBO nusqasynyń chempıondyq ataǵy bos tur. Bul reıtıngte Djeımı MakDonell kósh bastap keledi. Aıta keteıik, Janat Jaqııanov 11 naýryz kúni AQSh-tyń Toledo qalasynda amerıkalyq Roýshı Ýorrendi tóreshilerdiń sheshimimen jeńip, asa jeńil salmaqta WBA (Super), IBO tujyrymdarynyń jańa chempıony atanǵan bolatyn.