О́nerkásip órisi keńeıe túsýi tıis

Keshe Premer-Mınıstr Baqytjan Saǵyntaev eki kúndik jumys saparymen Shyǵys Qazaqstan oblysyna keldi. Aıta keteıik, bul Úkimet basshysynyń Prezıdent tapsyrmasy boıynsha elimizdiń óńirlerine jasap otyrǵan alǵashqy jumys sapary. Elbasynyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynyń aımaqtaǵy iri óner­kásiptik-ındýstrııadyq jáne aýyl sharýa­shylyǵy kásiporyndarynda, densaýlyq saq­taý jáne bilim berý nysandarynda júzege asyrylý barysymen tanysý maqsatynda arnaıy kelgen Úkimet basshysy jumys saparyn Aıagóz aýdanynda ornalasqan Aqtoǵaı ken baıytý kombınatynan bastady. Az ýaqyttyń ishinde álemdegi iri kásip­oryndardyń birine aınalyp úlgergen Aqtoǵaıda qazirgi ýaqytta 1500 adam eńbek etedi. 2016 jyly totyqtandyrylǵan kendi qaıta óńdeý boıynsha keshende 18,1 myń tonna katodty mys óndirildi. Kásiporyn jyl sońyna qaraı óndiris kólemin 20 myń tonnaǵa deıin jetkizýdi josparlap otyr. Kombınat basshylyǵy Premer-Mınıstrge ken alý tehnologııasy jaıynda áńgimelep jáne ony baıytý tehnologııasyn tanystyrdy. Memleket basshysy bıylǵy Jol­daýynda mindettegen jańa tehnologııalar­dy óndiriske engizý baǵytynda óńirde batyl ári qarqyndy jumys istep kele jatqan mekemelerdiń biri – «Maıly da­qyldar tájirıbelik sharýashylyǵy» JShS. Glýbokoe aýdanynda ornalasqan sharýashylyq tek dándi daqyldar ósirýmen ǵana shektelmeı, mal sharýashylyǵymen de shyndap shuǵyldanyp keledi. Byltyr osy jerde 600 basqa arnalǵan taýarly-sút fermasy jumysyn bastaǵan-dy. Baqytjan Saǵyntaev zamanaýı tehnologııalarmen jaraqtandyrylǵan fermaǵa arnaıy at basyn tirep, mundaǵy sıyr saýý zaly, emdeý-sanıtarlyq beketteri, mal azyqtandyrý sehy men mal azyǵy qoımalarynyń jumysymen tanysty. Shyǵys Qazaqstan oblysy ákiminiń orynbasary Dúısenǵazy Mýsın Úkimet basshysyna óńirde sútti mal sharýashylyǵyn damytýdyń 2015-2017 jyldarǵa arnalǵan baǵdarlamasy jaıynda baıandady. Onyń aıtýynsha, 2014 jyly oblysta 12 sút qabyldaý beketi bolǵan, 2017 jyldyń aıaǵyna deıin bul kórsetkishti 60-qa deıin jetkizý kózdelip otyr. Premer-Mınıstr bul kúni oblys orta­lyǵy – О́skemendegi Armatýra jáne Úlbi metallýrgııa zaýyttarynda da boldy. Sońǵy óndiris ornyn aralaý nátıjesi bo­ıynsha oblys ákimi D.Ahmetov, «Qazatom­ónerkásip» UAK» AQ basqarma tóraǵasy A.Jumaǵalıev jáne «ÚMZ» AQ basqar­ma tóraǵasy Iý.Shahvorostov Úkimet bas­shy­synyń qatysýymen óńirdiń áleýmettik-ekono­mıkalyq damýy aıasyndaǵy yntymaqtastyq týraly úshjaqty memorandýmǵa qol qoıdy. Baqytjan Saǵyntaev oblys ortaly­ǵyn­daǵy kóz mıkrohırýrgııasy emhanasyna da arnaıy baryp, aq jeleńdi abzal jandarmen júzdesti. Oblys ákiminiń orynbasary Ásem Núsipova osy jerde Úkimet basshysyna óńirde medısına kadrlaryn qaıta daıarlaýdyń úsh deńgeıli júıesin tanystyryp, bul baǵdarlama arqyly 3 jyldyń ishinde aımaqtyń 50 dárigerin shet elde tájirıbeden ótkizý josparlanyp otyrǵandyǵyn jetkizdi. Premer-Mınıstr jumys sapary barysynda oblystyń kásipkerlerimen dóńgelek ústel basynda júzdesip, memlekettik satyp alýlar júıesin odan ári damytýdyń ózekti máselelerin talqylady. Jıynda Úkimet basshysyna tolǵandyrǵan jaılaryn jasyrmaı jetkizip, saýal joldap, usynysyn aıtqan kásipkerler kóp boldy. Baqytjan Saǵyntaev barlyǵyn muqııat tyńdap, ózimen ere kelgen mınıstrlerge sol jerde túıtkildi máselelerge oraı jaýap bergizdi. – Elbasynyń kásipkerlik salasyndaǵy kedergilerdi joıý jónindegi tapsyrmasy bar. Úkimet «Atameken» palatasymen birlese otyryp, bul baǵytta birqatar sharalardy qolǵa alatyn bolady. Búgingi jumys sapary barysynda Shy­ǵys Qazaqstanda Memleket basshysynyń bıyl­ǵy Joldaýda júktegen úshinshi jań­ǵyrý­dy júzege asyrý maqsatynda aýqymdy jumys­tardyń júrgizilip jatqanyna kýá boldym. Aıagózdegi Aqtoǵaı ken baıytý kom­bı­natynda bir mezgilde 350 adam jumys isteıdi eken. Bul degenińiz ǵajap qoı. Son­dyqtan jańa tehnologııalardy óndiris­ke engizý baǵytyndaǵy jumystardy odan ári jan­dandyra túskenimiz abzal, – dedi Úkimet basshysy. Baqytjan Saǵyntaev О́skemendegi jumys saparyn D.Serikbaev atyndaǵy Shyǵys Qazaqstan memlekettik ýnıversıtetinde túıin­dedi. Munda óńirdegi mańdaıaldy oqý or­nynyń ǵylymı ázirlemelerimen tany­syp, aımaqtaǵy iri kásiporyndardyń ókil­derimen júzdesti. Premer-Mınıstrdiń jumys sapary búgin Semeı qalasynda jalǵasady. Azamat QASYM, «Egemen Qazaqstan» О́SKEMEN