Sýbsıdııa tek jumys isteıtinderge ǵana beriledi - Elbasy

Memleket basshysy Nursultan Nazarbaev aýyl sharýashylyǵy salasyndaǵy memlekettik sýbsıdııalardyń tek jumys isteıtin sharýalarǵa ǵana beriletinin taǵy bir márte eskertti. «Qazirgi kezde aýyl sharýashylyǵyn damytý úshin trıllıondaǵan aqshany berip jatyrmyz. Sýbsıdııalar texnıkaǵa, tyńaıtqyshqa, sýarmaly jerlerge, sosyn sút, et, qant jáne taǵy basqa salalarǵa bólinedi. Búginde sol sýbsıdııalardyń barlyǵyn jınap, basqasha taratý qajet. Eger de seniń qolyńnan kelse, sýbsıdııany saǵan berý kerek», - dedi Nursultan Nazarbaev otandyq buqaralyq aqparat quraldaryna bergen suxbatynda. Prezıdent óz sózinde memlekettik sýbsıdııalar keıbir sheneýnikterdiń «astaýyna» aınalǵandyǵyn, barlyǵynyń sol jerden aqshany qarpyp alýǵa tyrysatyndyǵyn atap ótti. Sol sebepti sýbsıdııalardy bólý júıesi qaıta qaralmaqshy. «Shynynda da, keń baıtaq jerimiz bar. Bir gektardan alatyn bıdaıymyz eń kóp degende 13,5 sentner, dál sondaı jerden myna turǵan Qytaı 25 sentner alyp otyr. Eger biz 13 sentnerdiń ústinen taǵy 5 sentner qosyp alatyn bolsaq, onda bıdaıdyń astynda qalamyz», - dedi Elbasy. Aıta keteıik, keshe respýblıkalyq arnalarda kórsetilgen baǵdarlama barysynda Memleket basshysy xalyqtyń kókeıinde júrgen kóptegen suraqtarǵa jaýap berdi.