Búginde elimizde dúngen etnosynyń sany 86 myńnan asady. Bul etnomádenı qozǵalys 1989 jyly Almatyda alǵashqy mádenı ortalyqtyń ashylýynan bastaý alyp, keıin elimizdiń kóptegen óńirin qamtyǵan keń jelige aınaldy. Qazirgi tańda ortalyqtyń fılıaldary birqatar oblystar men Astana qalasynda jumys isteıdi. 2022 jyly qurylǵan respýblıkalyq uıym 11 óńirlik birlestikti biriktirip, mádenı-aǵartýshylyq jáne qaıyrymdylyq baǵytta qyzmet atqaryp keledi.
Saltanatty jıynda sóz sóılegender dúngen etnosynyń el damýyna qosyp otyrǵan úlesin, mádenı murany saqtaýdaǵy rólin jáne Táýelsizdik qundylyqtaryn ilgeriletýge qosqan eńbegin erekshe atap ótti. Sondaı-aq dúngen ókilderiniń bilim, mádenıet, óner jáne sport salalaryndaǵy jetistikteri de sóz boldy.
QHA Tóraǵasynyń orynbasary Marat Ázilhanov ortalyqtyń basty baǵyttarynyń biri qaıyrymdylyq ekenin atap ótti. Onyń aıtýynsha, mesenattar áleýmettik osal toptardy qoldap, «Mektepke jol» aksııasy aıasynda turaqty kómek kórsetip keledi. Sonyń bir mysaly – Jambyl oblysynda 50 otbasyǵa kómek kórsetilgen qaıyrymdylyq sharasy.
Merekelik keshtiń kórkin mazmundy konserttik baǵdarlama asha tústi. Sahnada Kýddýs Kýjamıarov atyndaǵy uıǵyr mýzykalyq komedııa teatrynyń ártisteri óner kórsetip, aqyndar jyr oqydy. Ásirese urpaq sabaqtastyǵyn kórsetken qoıylymdar men poezııalyq týyndylar kórermenge erekshe áser qaldyrdy.
Mýzykalyq baǵdarlamada klassıkalyq jáne ulttyq áýender toǵysty. Qonaqtar Abaıdyń «Kózimniń qarasy» shyǵarmasyn tyńdap, halyqaralyq deńgeıdegi ánshilerdiń ónerin tamashalady. Qyrǵyzstannan kelgen ónerpazdar da keshtiń mazmunyn baıytyp, óz ónerlerin usyndy.
Sonymen qatar, sahnada bı qoıylymdary men sán kórsetilimi de ótti. Dızaıner Shınhý Rabıı usynǵan ulttyq toptama dástúr men zamanaýı stıldiń úılesimin kórsetti.
Keshtiń sharyqtaý sáti «Atameken» ánimen aıaqtaldy. «Asyl qazyna» balalar horynyń oryndaýyndaǵy bul týyndy birlik, dostyq jáne Otanǵa degen súıispenshilik ıdeıasyn aıshyqtady.
Is-sharanyń joǵary deńgeıde ótýine uıymdastyrýshylar men birlestik belsendileri atsalysty. Jalpy alǵanda, bul mereke dúngen etnomádenı birlestiginiń eldegi qoǵamdyq kelisimdi nyǵaıtýǵa, mádenı ártúrlilikti saqtaýǵa jáne Táýelsizdik qundylyqtaryn dáripteýge qosyp otyrǵan úlesin aıqyn kórsetti.
