Foto: egemen.kz/Erlan Omar
Mashına jasaýshylar forýmy 1300-den astam delegattyń basyn qosty, onyń ishinde Avstrııa, Germanııa, Italııa, QHR jáne basqa da 20-dan astam elden kelgen jetekshi óndirýshiler, mamandar men bıznes ókilderi bar.
Premer-mınıstr Oljas Bektenov forýmǵa qatysýshylarǵa arnaǵan quttyqtaý sózinde elimizde salalardy jańǵyrtý men ekonomıkanyń turaqty ósýiniń ınstıtýsıonaldyq negizine aınalǵan jańa Konstıtýsııanyń qabyldanǵanyn atap ótti.
«Biz bárimiz el taǵdyryn aıqyndaıtyn eleýli kezeńniń kýási boldyq. Qoǵamnyń belsendi qoldaýymen referendýmda jańa Konstıtýsııa qabyldandy. Árqaısymyzǵa málim, ekonomıkanyń jáne qoǵamnyń barlyq salasyn odan ári jańǵyrtýǵa múmkindik beretin elimizdiń Negizgi zańynyń avtory – Memleket basshysy Qasym-Jomart Kemeluly Toqaev.
Asa mańyzdy qujat ultymyzdyń uzaqmerzimdi damý baǵdaryn aıqyndap, Qazaqstannyń kez kelgen syn-qaterlerge tótep berýin qamtamasyz etedi. Osylaısha, «Ádiletti Qazaqstandy» qurý úshin berik quqyqtyq negiz qalandy. Bul ekonomıkaǵa, sonyń ishinde ónerkásip salasyna da erekshe jaýapkershilik júkteıdi ári elimizdiń mol shıkizattyq áleýetin halyqtyń ál-aýqatyn jaqsartýǵa baǵyttaı alatyn qýatty óńdeýshi sektordy damytýdy talap etedi», dedi Oljas Bektenov.
Premer-mınıstr Memleket basshysynyń Qazaqstan halqyna Joldaýynda jáne Úkimettiń keńeıtilgen otyrysynda bergen tapsyrmalaryna sáıkes, elimizde mashına jasaý salasyn damytý úshin boljamdy ári turaqty orta qalyptastyrý boıynsha jumystar júrgizilip jatqanyn atap ótti. Memleket pen bıznestiń ortaq mindeti – ádil jáne qaýipsiz eńbek jaǵdaıyn qamtamasyz etý, áleýmettik áriptestik júıesin damytý.
О́tken jyly mashına jasaý óndirisi 5,7 trln teńgege jetip, naqty kólem ındeksi 13%-ǵa ósti. Otandyq óndirýshiler syrtqy naryqtarǵa batyl shyǵyp keledi, sońǵy 5 jylda eksport kólemi eki eseden asyp, 1,3 mlrd dollardan 3,1 mlrd dollarǵa deıin jetti. Respýblıka boıynsha barlyǵy 4 myńǵa jýyq zaýyt jumys isteıdi, onda 130 myńnan astam bilikti maman eńbek etedi.
Negizgi kapıtalǵa tartylatyn ınvestısııanyń úshten birge ósýi – 376 mlrd teńgege jetýi salany ári qaraı jańǵyrtýǵa negiz bolady. Barlyq negizgi baǵytta, onyń ishinde, avtomobıl, aýyl sharýashylyǵy, temirjol jáne elektrotehnıkalyq mashına jasaý salalarynda oń serpin baıqalady.
