Shymkentte Naýryz-jármeńke ótti

Shymkent qalasynda Naýryz merekesi qarsańynda aýyl sharýashylyǵy taýar óndirýshileriniń jármeńkesi uıymdastyryldy. Sharada 97 mıllıon teńgeni quraıtyn 160 tonnaǵa jýyq azyq-túlik taýarlary naryqtaǵydan 15-20 paıyz tómen baǵada bosatyldy. Jalpy jármeńke sóresine  61 tonna  et,  50 tonna kókónis,  5 tonna balyq,   5 tonna keptirilgen jemis,  8 tonna sút,  2 tonna shubat,10 myń dana   jumyrtqa shyǵaryldy.  Sondaı-aq 6 tonnaǵa jýyq ósimdik maıy men bal ónimderi usynyldy. Búginde  oblystyń  aýyl  sharýashylyǵy  jalpy  óniminiń úlesi respýblıkaǵa  shaqqanda  12,3 paıyzdy  quraıdy. Al, jalpy óndirilgen ónimder boıynsha maqtanyń – 100,  júzimniń - 68,5,  baqshanyń – 61, jemis-jıdektiń -38, maqsarynyń - 36,   kókónistiń- 25,  júgeriniń - 23,  súttiń -13,5, ettiń - 12,3 paıyzy Ońtústikte óndiriledi.   Bul oblystyń agrarlyq saladaǵy eksporttyq jáne áleýetiniń joǵarǵy ekendigin kórsetedi. Aǵymdaǵy jyldan bastap Ońtústikte memleket basshysynyń tapsyrmasyna sáıkes, aýyl sharýashylyǵy óndiristik kesheniniń 2017-2021 jyldarǵa arnalǵan memlekettik baǵdarlamasy qabyldanyp, tıisti  jumystar atqarylýda. Baǵdarlamanyń negizgi maqsaty - memlekettik qoldaýlar men qarjylyq quraldardy shaǵyn jáne orta bızneske jáne kooperasııalar júıesin damytýǵa baǵyttap, aýyl turǵyndarynyń ál aýqaty men  eńbek ónimdiligin arttyrý. Búgingi  kúnniń  ózinde  oblysta  25  myńnan  astam  jeke jáne  qosalqy fermerlik sharýashylyqtardyń  basyn  biriktiretin  304 kooperatıv qurylǵan. Olardyń  birqatary  memleketten  qarjylaı  qoldaý  alyp, órisin keńeıtýge kirisken.