Zamanaýı qarý men áskerı tehnıka óndirisiniń jaıy talqylandy

Astanada Qorǵanys mınıstrligi men Qorǵanys jáne aeroǵarysh ónerkásibi mınıstrliginiń birlesken keńesi ótti, dep habarlady primeminister.kz. Kún tártibinde mınıstrlikter arasyndaǵy ári qaraıǵy ózara is-qımyl máseleleri qaralyp, otandyq qorǵanys-ónerkásibi keshenin damytýdyń strategııalyq baǵyttary talqylandy. Qazaqstan qorǵanys vedomstvosynyń basshysy general-polkovnık S. Jasuzaqov Qorǵanys mınıstrligi otandyq qorǵanys kásiporyndarynyń ónimderi men qyzmetterine negizgi tapsyrys berýshi bolyp tabylatynyn, jáne áskerı ónimdi jetkizip berýdiń sapasy men ýaqyttylyǵyna armııanyń jaýyngerlik qabilettiligi men jalpy memlekettiń qorǵanys qabilettiligi tikeleı baılanysty ekenin atap ótti. Qorǵanys mınıstrliginiń habarlaýynsha, keńes barysynda zamanaýı qarý-jaraq pen áskerı tehnıkanyń joǵary tehnologııalyq óndirisin ári qaraı retke keltirý maqsatynda qarý-jaraqtyń negizgi túrlerine tehnıkalyq qyzmet kórsetý jáne jóndeý júıesi boıynsha tujyrymdamalyq usynystar egjeı-tegjeıli pysyqtaldy. Esterińizge sala ketsek, Qorǵanys jáne aeroǵarysh ónerkásibi mınıstrligi Qazaqstan Respýblıkasy Prezıdentiniń 2016 jylǵy 6 qazandaǵy  №350 Jarlyǵyna sáıkes qurylǵan bolatyn.