Qytaı Qostanaıǵa ınvestısııa salmaq

Qostanaı oblysynyń ákimi Arhımed Muhambetov Qazaqstan Respýblıkasy Premer–Mınıstriniń orynbasary Asqar Mamınniń jetekshiligimen úkimettik delegasııa quramynda Qytaı Halyq respýblıkasynda bolyp, birqatar iskerlik kelisimderge qatysty. QHR Premer-Mınıstriniń orynbasary Chjan Gaolımen bolǵan kelissózderde taraptar keń aýqymdy máselelerdi qarady. Onyń ishinde Qostanaı oblysynyń  qytaı naryǵyna astyq eksporttaý, temir keni ónimderin jetkizýde temir jol tarıfterin tómendetýge qatysty jáne basqa da ózekti máseleler qozǵaldy. Oblys ákimdiginiń baspasóz qyzmetiniń habarlaýynsha, eki kúndik saparda Arhımed Muhambetov iri transulttyq kompanııalarmen jáne ınvestısııalyq qorlar jetekshilerimen kezdesip, mashına qurastyrý jáne aýyl sharýashylyǵy ónimderin óńdeý salasynda máselelerdi talqylady. Arhımed Begejanuly ımport jáne (SMS)  jabdyqtaryn eksporttaý jónindegi Qytaı memlekettik kompanııasynyń prezıdenti Sıý Sheng Vang jáne Anhui Jianghual Automobile Co Ltd (JAC) kompanııasynyń basqarma tóraǵasy Djı Anmen kezdesýde avtomobıl jasaý salasyndaǵy yntymaqtastyq jóninde áńgimelesti. «Allıýr kompanııasy tobyna» kiretin Qostanaı avtoónerkásibi kásipornynyń ókilderi qytaılyq áriptestermen  «SaryArkaAvtoProm» zaýytynyń bazasynda JAC  modelin júıeli óndirisine ınvestısııa salý jáne eki jaqty jobalardy damytý máseleleri talqylady. Aımaq basshysy Qostanaı oblysy  óńirinde sellıýloza-qaǵaz kombınaty jelisin jasaý jobasyn júzege asyrý jaıyn J.S. Machine kompanııasynyń atqarýshy dırektory Mın Lımen talqylady. Al bul kompanııa qaǵaz ónerkásibi úshin  jabdyqtar shyǵarý jóninen álemdik kóshbasshy bolyp sanalady. «Jibek joly» ınvestısııalyq qory ókilderimen bolǵan kezdesýde Qostanaı qalasyndaǵy agroónerkásiptik park qurylysyn júzege asyrý múmkindikteri qaraldy. Sonymen qatar aýyl sharýashylyǵy ónimderin, sonyń ishinde maıly daqyldaryn óńdeý máseleleri de qamtyldy. Aıtpaqshy, oblys basshysy kelissózder júrgizgen «Jibek joly» ınvestısııalyq qorynyń ınvestısııalary Jibek joly ekonomıkalyq beldeýinde jáne Teńiz Jibek joly boıynda ornalasqan elderdegi iri jobalarǵa baǵyttalǵan. Názıra Járimbetova, "Egemen Qazaqstan" QOSTANAI