QR matematıka men jaratylystaný bilimi boıynsha úzdik ondyqta

Qazaqstan ǵylymnyń birneshe salasynda úzdik ondyqqa kirdi. Bul málimetterdi Oqý jetistikterin baǵalaýdyń halyqaralyq assosıasııasy habarlady. Matematıka salasyndaǵy bilim sapasy boıynsha Qazaqstan mektepteriniń segizinshi synyp oqýshylary jetinshi orynda. Qazaqstannyń aldynda Reseı tur. Úzdik úshtikte Sıngapýr, Ońtústik Koreıa, Taıvan bar. Al bastaýysh synyptaryna matematıkadan sabaq berý deńgeıiniń reıtıngine Qazaqstan kirmegen. Sonymen qatar elimiz jaratylystaný ǵylymdaryn segizinshi synyptarda oqytý boıynsha reıtıngte onynshy orynda tur. Kórshiles Reseı jetinshi oryn alsa, úzdik úshtikke Sıngapýr, Japonııa, Taıvan kirgen. Al jaratylystaný ǵylymdaryn tórtinshi synyptarda oqytý boıynsha reıtıngte Qazaqstan toǵyzynshy oryn alǵan. Bul tizimde alǵashqy úshtikte Sıngapýr, Ońtústik Koreıa, Japonııa bar. Tórtinshi orynda Reseı tur. Mekteptegi matematıkalyq jáne jaratylystaný ǵylymdaryn oqytý sapasyn halyqaralyq monıtorıngtik zertteý (TIMSS)  - oqý jetistikterin baǵalaýdyń Halyqaralyq assosıasııasy uıymdastyrǵan baǵdarlama. Onyń negizgi maqsaty - matematıka jáne jaratylystaný bilimin bastaýysh jáne negizgi metepte oqytý deńgeıin baǵalaý. Bul reıtıng ár tórt jyl saıyn jasalady.