Qazaqstannyń úzdik ınvestorlary marapattaldy

Búgin «Qazaqstan: Jańa ınvestısııalyq múmkindikter» taqyrybyndaǵy konferensııa barysynda elimizdegi úzdik ınvestorlar marapattaldy, dep xabarlady QazAqparat. Bıyl Investısııalar jáne damý mınıstrligi elimizde bir jyldan jıyrma jylǵa deıin tabysty qyzmet etip kele jatqan kompanııalardy iriktep aldy. Olardyń ishinde Qarashyǵanaq munaı-gaz ken ornyn óńdeý jáne paıdalaný boıynsha «QPO» birlesken kásiporny, qubyr óndiretin «Tenaris» ıntalıan kompanııasy, ýran salasyndaǵy japonnyń «NaýubeniCorporation», nemistiń «HeidelbergCement» qurylys materıaldary kompanııasy, ekologııalyq taza otyndy damytýmen aınalysatyn «KOLON» káris kompanııasy, reseılik «EFKO» maı óndirýshi kásiporny, «Kelun Kazpharm» qytaılyq farmasevtıkalyq kompanııasy jáne «Pladis» túrik kondıter buıymdaryn óndirýshi kompanııasy (Qazaqstanda "Ulker" degen ataýmen tanymal) bar. Sonymen qatar, mınıstr Jeńis Qasymbek otandyq ekonomıkaǵa qosqan ınvestısııalyq úlesi úshin Eýropa qaıta qurý jáne damý banki men Qazaqstandaǵy Sheteldik ınvestorlar keńesi qaýymdastyǵyn arnaıy dıplomdarmen marapattady. Aıta keteıik, búgingi konferensııada Qazaqstandaǵy ınvestısııalyq jobalardyń kórmesi ashyldy. Negizgi maqsat – elimizdegi ınvestısııalyq múmkindikterdi kórsetip, jobalarǵa sheteldik qarjyny tartý.