Pavlodar qalasynda 62 muz aıdyny bir kúnde iske qosyldy, dep habarlaıdy BNews.kz.
Pavlodar oblysynda qysqy sport túrlerin damytýǵa basa nazar aýdarylǵan. Sondyqtan, bıyl pavlodarlyqtar úshin 62 irili-usaqty muz aıdyny quıyldy. Bul – buryn-sońdy bolmaǵan kórsetkish. Buǵan deıin olardyń qatary áldeqaıda az bolǵan.
Pavlodar oblystyq dene shynyqtyrý jáne sport basqarmasy basshysynyń orynbasary Nurlan Esembaevtiń aıtýynsha, muz aıdyndary kóktemge deıin halyq ıgiligine jaramaq.
«Oblysta qysqy sport túrlerine degen qyzyǵýshylyq artýda. Búgingi kúni balalar-jasóspirimder mektepterinde mánerlep syrǵanaý men hokkeımen aınalysatyndardyń qatary 500-den asqan», – deıdi Nurlan Esembaev.
Aıta keteıik, Pavlodar oblysynda sportpen júıeli túrde aınalysatyn azamattardyń sany 220 myńǵa jetken. Al 25 jyl buryn bul kórsetkish nebary 90 myń bolǵan.
