Kóne jazba mádenıetimiz bolyp sanalatyn Orhon-Enıseı jazbalarynan bastap, Tonykók, Kúltegin zamanyn oraı ótip, Jambyl men Kenen syndy kemeńgerler keńistigine bir-aq shyqqan ǵalym qazaq ǵana emes, túrki dúnıesine de aıtarlyqtaı eńbek sińirdi. Kezinde uly Muhtar Áýezovtiń ózi ýnıversıtet qabyrǵasynda qalýǵa yqpal etken, al ustazdary Beısenbaı Kenjebaev pen Zeınolla Qabdolovtar talantyn tap basyp tanyǵan sol kezdegi bala Myrzataı búgingi dana Myrzataıǵa deıingi uzaq ta ulaǵatty joldy júrip ótti. Álkeı Marǵulan jas ǵalymnyń kandıdattyq dıssertasııasyn doktorlyqqa teńegeni bir bólek áńgime. Sondaı-aq, Myrzataı Joldasbekov qazaq ǵylymynda ǵylymı oılaý men derekti negizdeýdiń ózine tán jolyn tapty deýge bolady. Sol kezdegi saıası qarsylyqtarǵa qaramaı Muhtar Maǵaýın ekeýi kóne túrki jáne handyq dáýirdegi ádebıetten ǵylymı jumys jazǵany da erlikpen birdeı is edi.
Al elimiz egemendik alyp, azattyq tańy atqanda da Myrzataı Joldasbekov ózin memleket qaıratkeri retinde tanytty. Elbasynyń janynda bolyp, el irgesin bútindeýge, baǵytyn aıqyndaýǵa úles qosty. Qalamgerligi men qaıratkerligi qatar órilgen kórnekti tulǵany jýyrda ǵana Memleket basshysy Nursultan Nazarbaev mereıtoıymen quttyqtap, I dárejeli «Barys» ordenimen marapattaǵan bolatyn. Sondaı-aq, samaldy Saryarqanyń tórinen bastalǵan seksen jyldyq ǵumyrlyq mereıtoı abyzdyń ózi dúnıege kelgen Áýlıeata topyraǵynda jalǵasty.
Jambyldyq jurtshylyq týǵan jerge taban tiregen tulǵany úlken qurmetpen qarsy aldy. Ǵalymmen birge kompozıtor Ilııa Jaqanov pen jazýshy Bolat Bodaýbaı Taraz jerine kelip, qurmetti qonaq boldy. Odan keıin Myrzataı Joldasbekov ózi dúnıege kelgen Talas aýdany, Aqtóbe aýylyna baryp, mereıtoılyq arnaıy rásimge qatysty. Bul kúni dala tósine qazaqy jolmen kıiz úıler tigilip, án shyrqaldy. О́tken kúnnen estelikter aıtylyp, Jambyl taǵylymy, Kenen keńistigi tóńireginde áserli áńgimeler shertildi.
.jpg)
Erteńine Taraz Memlekettik pedagogıkalyq ınstıtýtynda Myrzataı Joldasbekovpen kezdesý ótti. Oǵan oblys ákiminiń orynbasary Erqanat Manjýov, ınstıtýt rektory Darııa Qojamjarova, óńirdiń zııaly qaýym ókilderi, sondaı-aq, joǵary oqý ornynyń oqytýshylar quramy men stýdentter qatysty. Ataqty ǵalym jınalǵan kópshilikke alǵysyn aıtyp, týǵan elge, jerge degen óziniń lebizin arnady. «Meniń týǵan elimniń abyroıy juldyzdan da bıik, men úshin árbir adamy Kúnnen ystyq, Aıdan jaryq. Týǵan elge árdaıym rızamyn», dep tebirengen mereıtoı ıesi ómir jolynda kezdesken tartysty kezeńder jóninde de baıandady. Budan keıin Jambyl atyndaǵy «Rýhanııat» ortalyǵynda bolyp, áýlıeatalyq óner ıelerimen kezdesti. Munda da Myrzataı Joldasbekov óziniń ómir jáne shyǵarmashylyq jolynan syr shertse, dosy Ilııa Jaqanov ǵalymnyń kompozıtorlyq qyryna erekshe toqtaldy. Al Bolat Bodaýbaı qaıratkerligi haqynda áńgime órbitse, oblystyq qazaq drama teatrynyń aktrısasy, Memlekettik syılyqtyń ıegeri Nursıfat Salyqova áýlıeatalyq óner ıeleri atynan sóz sóılep, tilek bildirdi. Belgili aqyn, Qazaqstannyń Eńbek sińirgen qaıratkeri Qaıyrbek Asanov Myrzataı Joldasbekovtiń Iran Islam Respýblıkasynda elshilik qyzmette júrgende arnap jazǵan óleńin oqydy.
Myrzataı Joldasbekov ǵylymmen qatar, qazaqtyń án men kúı ónerine de úles qosqan tulǵa. El men jerdiń kıesin uǵynyp ósken ol óz aldyna kisilik mektebin qalyptastyryp, taǵylym órnegin saldy. Oblystyq qazaq drama teatrynda ǵalymnyń «Atanǵanym Myrzataı – el arqasy» atty shyǵarmashylyq keshi ótti. Aıtýly sharaǵa Jambyl oblysynyń ákimi Kárim Kókirekbaev arnaıy kelip qatysty. Biraq bul saltanattyń ereksheligi – Áýlıeata aspanynda án áýelep, kúı shalqydy. Nurlan О́nerbaev, Klara Tólenbaeva, Dosymjan Tańatarov, Gúlmıra Sarına, Aıgúl Elshibaeva, Ardaq Balajanova syndy ánshiler tamyljyta án shyrqasa, jyraý Elmura Jańabergenova tolǵaý oryndady. Sondaı-aq, kúıshi Janǵalı Júzbaev qasıetti qara dombyra arqyly kúı qudiretin tanytty. Belgili aıtysker aqyn Amanjol Áltaev arnaý aıtyp, kesh shyraıyn asha tústi.
Al arnaıy merekelik dastarhan ústinde oblys ákimi Kárim Kókirekbaev Myrzataı Joldasbekovti mereıtoıymen quttyqtap, temir tulpardyń kiltin tabys etti. Kesh ıesi de elge, halyqqa rahmetin aıtyp, alǵysyn bildirdi. Ult tulǵalarynyń ulaǵatyn boıyna sińirip ósken kórnekti qaıratkerdiń, ǵulama ǵalymnyń seksenniń seńgirine shyqqan mereıtoıy osylaısha kóne Taraz jerinde laıyqty deńgeıde atalyp ótti.
Hamıt Esaman,
«Egemen Qazaqstan»
Jambyl oblysy
