Sharada TarMPI rektory Darııa Qojamjarova mereıtoı ıesin ınstıtýt ujymynyń atynan quttyqtap, onyń ult rýhanııatyna, qazaq ádebıeti men óneriniń damýyna qosqan ólsheýsiz úlesin jetkizdi.
– Myrzataı Joldasbekuly – ulttyq ıdeologııany negizdeýde ultqa qyzmet etýdiń sony úlgisin kórsetip júrgen azamattardyń biregeıi. Ol – túp-tamyrymyz sanalar Túrik qaǵanaty kezindegi Orhon-Enıseı jazba eskertkishterin qazaq ǵalymdary arasynda alǵashqylardyń biri bolyp jańasha zerttep, ony qazaq tilinde sóıletti. Ol – kópshilik «jyr alyby» dep at qoıyp, aıdar taqqan Jambyldyń shyǵarmashylyǵyn tyńnan túren salyp zerdeleı bildi. Myrzataı Joldasbekuly – egemendiktiń eleń-alań kezinen Elbasynyń qasynan, talaı ıgilikti istiń basynan tabyldy. Ulaǵatty ǵalym, tálimdi ustaz, bilikti basshy retinde Siz birneshe býyn urpaqty tárbıelep, elimizde tájirıbeli fılologtar men tarıhshylar mektebin qalyptastyra aldyńyz. Adamzattyń Abaıy «Adamnyń adamshylyǵy jaqsy ustazdan bolady» deıdi. Osy rette Siz sııaqty ǵalymnyń bizge shamshyraq ispettes jol bastap júrgeni júregimizge qýanysh uıalatady. Sizdiń júrip ótken seksen jyldyq ǵumyryńyz – Siz úshin jaı jyldar jıyntyǵy emes, izdenis pen eńbektiń, talpynys pen tabystyń, úırený men úıretýdiń jyldary boldy. Búgingi mereıli jasyńyzǵa taǵy da uzaq ǵumyr tileı otyryp, jetken jetistikterińizdiń barlyǵyn – etken eńbegińizdiń janǵany, maqsattaryńyzdyń oryndalǵany dep bilemiz. Ulttyq múdde jolynda atqarylar mańyzdy isterge sózimen de, isimen de súbeli úles qosyp kele jatqan eńbek jolyńyz búginde jemisti jalǵasyn taýyp keledi. Sondyqtan da, Sizdi keıingi býynǵa ulaǵatty úlgi kórsetip kele jatqan zııaly tulǵalardyń biri dep baǵalaımyz, – dedi D. Qojamjarova.
Sonymen qatar, ınstıtýt basshysy M. Joldasbekovtyń el aldyndaǵy eleýli eńbegin eskerip, qoǵam qaıratkerin «Taraz memlekettik pedagogıkalyq ınstıtýtynyń 50 jyldyǵy» merekelik medalimen marapattap, syı-sııapat kórsetti.
Sondaı-aq, saltanatty jıynda ǵumyry ǵıbratty, taǵdyry taǵylymdy tulǵany «Qazaqstan – Taraz» Jambyl oblystyq telearnasynyń dırektory Meırambek Tólepbergen, D. Qonaev atyndaǵy Halyqaralyq qordyń Jambyl oblystyq bólimshesiniń tóraǵasy Amankeldi Qarentaev syndy azamattar quttyqtady.
Al, ataqty kompozıtor ári óner zertteýshisi, Qazaqstannyń eńbek sińirgen mádenıet qaıratkeri Ilıa Jaqanov túrkitanýshy ǵalymnyń sazgerlik qyry tóńireginde keńinen áńgime órbitip, áserli esteligimen bólisti.
Qazynaly qart Qarataýdyń qoınaýynda, Talastyń boıynda, Aqtóbe atty aýylda dúnıege kelgen Myrzataı Joldasbekuly 1955 jyly Almatyǵa kelip, Qazaq memlekettik ýnıversıtetiniń Fılologııa fakýltetine oqýǵa túsedi. Ol bilim men ǵylymnyń qarashańyraǵy atanǵan ordaly oqý ornynda Muhtar Áýezov, Álkeı Marǵulan, Esmaǵambet Ysmaıylov, Beısenbaı Kenjebaev, Muhametjan Qarataev, Nyǵmet Saýranbaev, Zeınolla Qabdolov sekildi ǵulama ǵalymdardan dáris alyp, ǵylym jolyna birjola bet burady.
Kóziqaraqty kópshilik qaýym Myrzataı Joldasbekovti Túrik qaǵanaty kezindegi Orhon-Enıseı jazba eskertkishterin qazaq ǵalymdary arasynda alǵashqylardyń biri bolyp jańasha zerdelep, qazaq tilindegi aýdarmasyn ǵylymı aınalymǵa engizgen, jyr alyby Jambyl Jabaev pen Kenen Ázirbaevtyń shyǵarmashylyǵyn zertteýge mol úles qosqan, olardyń aqyndyq mektebin jan-jaqty taldaǵan ǵalym, kóptegen memlekettik qyzmetterdi atqarǵan qaıratker retinde jaqsy biledi.
Jıyn barysynda mereıtoı ıesi aqpeıil ystyq yqylasy úshin jambyldyq jurtshylyqqa rızashylyǵyn bildirip, taǵylymy mol ǵıbratty áńgime aıtty. Ásirese, jastardyń sanasyna ulttyq rýhty sińirý, olardy ultjandy azamat bolýǵa úndeý jáne tól tarıhymyzdy qaıta zerdeleýde ǵasyrlar qoınaýynan tamyr tartatyn Qazaq memleketiniń qalyptasýy men damýy jaıynda da syr shertti.
Kesh sońy pedagogıkalyq oqý ornynyń óner ujymdarynyń konsertine ulasty.
– Taraz memlekettik pedagogıkalyq ınstıtýtynda bastaý alǵan «Janyńda júr jaqsy adam» jobasy aıasynda óziniń eren eńbegimen, tereń bilimimen, óristi ónerimen ozyq shyqqan tulǵalarmen kezdesýler uıymdastyrý qolǵa alyndy. Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyn júzege asyrý maqsatyndaǵy shara jastardyń ómirge shynaıy kózben qarap, óz taǵdyrlaryna ózderi ıelik ete alatyn azamattar bolýyna muryndyq bolmaq. Búgingi jıyn da atalǵan joba aıasynda ótkizilip otyr, – dedi TarMPI-dyń Aqparattyq-ımıdjdik qyzmetiniń jetekshisi Jandar Asan.
