«Búginge deıin 24 000 myń bılet satyldy. Taǵy da 28 000 bıletti alý jóninde kelisim-sharttarǵa qol qoıyldy», deıdi oblystyq kásipkerlik jáne ındýstrııalyq-ınnovasııalyq damý basqarmasy basshysynyń orynbasary Qarlyǵash Bekbaeva.
El ómirindegi mańyzdy oqıǵany tamashalaýǵa mektep oqýshylary men stýdentteri de asyq. Oblystyq bilim berý basqarmasynyń basshysy Nursáýle Saılaýova «Bul sapardyń mańyzy erekshe» degen pikirde. Onyń aıtýynsha, Astanaǵa birinshi bolyp ata-ana qamqorlyǵynsyz qalǵan, az qamtylǵan otbasylardyń balalary, oqý úzdikteri men túrli baıqaýlardyń jeńimpazdary jiberiledi. Mektep oqýshylary men kásibı-tehnıkalyq kolledj stýdentteriniń Astanaǵa barýy úshin jergilikti bıýdjetten arnaıy qarjy bólingen. Balalardyń alǵashqy legi 9 maýsymda jolǵa shyǵady.
Atyraý munaı jáne gaz ýnıversıtetiniń 52 stýdenti men oqytýshylary 11 maýsymda, H.Dosmuhamedov atyndaǵy Atyraý memlekettik ýnıversıtetiniń 210 stýdenti men 60 qyzmetkeri 15 maýsymda Elordany betke alady. Kórme bıletterin alýǵa óńirdegi iri kásiporyndar men kompanııalar da qyzyǵýshylyq tanytýda. Mysaly, «Embimunaıgaz» AQ qyzmetkerleri úshin charterlik sapar uıymdastyrýdy josparlap otyr.
«EKSPO-2017 kórmesi aıasyndaǵy mádenı baǵdarlamaǵa munaıly aımaqtyń ónerpazdary 16-20 maýsym aralyǵynda qatysady. Oǵan 800-ge jýyq mádenıet qyzmetkeri barady. Al aýyl sharýashylyǵy jármeńkesinde kórme qonaqtary Atyraý balyǵynan dám tatady. 1 qazanǵa deıin «Amangeldi» JShS-niń 580 tonna balyq ónimderi jetkiziledi.
Halyqaralyq sharada jumys isteýge nıet bildirýshilerden 400 ótinish túsken. Biraq belgilengen kvotaǵa sáıkes munaıly aımaqtan 50 erikti ǵana barady.
Baqytgúl BABASh,
«Egemen Qazaqstan»
