Kıiz úıge sándik sıpatpen qatar jel soqqanda shańyraqtyń shaıqalmaı turýy úshin baılanatyn tógilme shashaqty jelbaý, ýyq pen keregeniń túıisken jerin syrtynan bastyryp taǵatyn órnekti basqur, eki nemese úsh jerden aıqastyra tartyp keregege baılaıtyn jalpaq úzik baýlar men kıiz úıge qajetti ártúrli toqyma buıymdaryn osy jármeńkeden taba alasyz. Qolynan shyqqan buıymdaryn aınaldyra ilip qoıyp, kelgen-ketkenderge sharshamastan tanystyryp, mańyzyn túsindirip jatqan Qanykúl Lekerqyzy Qazaly aýdanynan kelipti.
Kóktem kelip, kún jylyna astanalyqtardyń yǵyryn shyǵaryp súıkimi ketken úlbiregen baqbaqty móldiretip sán retinde taǵýǵa da bolady eken. Astanalyq Natalıa Ponomarevanyń tumsa tabıǵatty syıdyrǵan kishkentaı áshekeılerine qarap turyp kóktem qaıta týǵandaı áserge qaldyq. Adamdy sespeı qatyratyn alqa gúlder tuqymdasyna jatatyn ýly ıt jıdek te móldir shynynyń ishine momaqan keıip te syıyp ketipti. Odan bólek biteýgúl, sıren, roza men ártúrli baqsha gúlderi de syrǵa men saqına bolyp shyǵa kelgen.
– Reseılik sheberlerdiń zergerlik shaıyrdan jasalǵan buıymdaryn ınternetten kórip, qatty qyzyqtym. Buryn polımer balshyqtarmen jumys istegen edim. Gúlderdiń jabyq keńistikte móldirep turǵany qyzyqtyrdy. Birtindep osy salada izdene júrip, ózim de jasaı bastadym. Otbasymyzben osy salaǵa áýestenip kettik. Tabıǵat aıasyna shyǵa qalsaq boldy, erekshe shópter men gúlderdi jınap júretin boldyq, – degen sheber buıymdaryn negizinen qalalyq jármeńkelerge shyǵarý arqyly satatynyn aıtty. Mundaı áshekeılerdi jasaý úshin epoksıdti shaıyrdy formaǵa keltirip, quıý arqyly jasalady. Sapaly jasalǵan buıym birneshe jylǵa deıin saqtala beredi.
Jármeńkege arnaıy kelgen BUU-nyń EKSPO-2017 bas komıssary Jıhan Sultanoǵly qoldanbaly óner sheberleriniń jetistikteri men múmkindikteri týrasynda aıta kelip, ónerdiń barshaǵa ortaq ekenin jetkizdi.
– Sizderdiń qolóner kásipterińizdiń el úshin, qoǵam úshin, otbasylaryńyz úshin mańyzy zor. О́nerdiń arqasynda Qazaqstan halqynyń salt-dástúri týady. О́z elderińizdiń tarıhy men sulýlyǵyn túster alýandyǵy men shyǵarmashylyqtaryńyz arqyly pash etesizder. Shyn mánisinde óner – ortaq, ony jas ta, kári de túsinedi, – deıdi Jıhan Sultanoǵly. Bas komıssar kópshilikti jármeńkege qatysýǵa shaqyryp, sheberlerdiń isine sáttilik tiledi.
– Qolóner kásibi turaqty jumys oryndaryn qura otyryp, ekonomıkany ártaraptandyra túsedi. Negizinen shaǵyn jáne orta kásipkerlik aıasyn keńitip qana qoımaı, áıelderdiń basqarýymen genderlik teńdikke de úles qosady. Innovasııalyq tehnologııalar men jańa ıdeıalardy ákelýimen mańyzdy bolyp sanalatyn qolónershilik kásibi kreatıvti ekonomıka qurýdyń basynda tur. Odan bólek jastar úshin erekshe úlgi kórsetip otyrsyzdar, qoǵamǵa jaǵymdy ózgerister ákele bergeısizder, – dedi J. Sultanoǵly.
Al qyzylordalyq Aısulý Sadyqovanyń adamdar men janýarlardy, tabıǵat elementterin beıneleıtin beınelik oıynshyqtar jasap kele jatqanyna 12 jyldan asqan. Onyń qolynan shyqqan «Baıdyń qyzy» atty myna qýyrshaqtyń poshymynan ómirden qıyndyq kórmegen erketotaı qyzdyń dúńk etpe minezi birden baıqalady. Onyń aıtýynsha, keıipker beınesin jasaýda kóbine qazaq halqynyń ulttyq ańyz-áńgimelerine, qııal-ǵajaıyp ertegilerine júginedi.
– Ákem aǵashtan túıin túıetin sheber jan. Ul bala joq bolǵanyqtan, kishkentaıymnan ákeme kómektesip júrip, qyr-syryna qanyp óstim. Kórmege shyǵyp júrgende kıizden oıynshyqtar jasaýǵa bolatynyn kórip, osy salaǵa oıysa bastadym. Qazir Túrkistan qalasynan qolóner buıymdary dúkenin ashyp jatyrmyn, – degen Aısulý qýyrshaq jasaýdyń qıyn emestigin aıtady. – Aldymen bas poshymyn jasaǵan soń, qasy-kózin ıne-jippen kestelep, bet álpeti retke keltiriledi. Keıin denesine basyn ornatyp, qýyrshaqqa arnalǵan kıimmen kómkeremiz. Negizinen kádesyı retinde kóp satylady, – deıdi Aısulý Sadyqova.
Qazaqstan qolónershileri odaǵymen birlesip uıymdastyrylǵan bul jármeńke qolónershilerdiń shyǵarmashylyq qabiletterin yntalandyrýǵa, olardyń ekonomıkalyq múmkindikterin arttyrýǵa jáne ulttyq ónerdi nasıhattaý maqsatynda uıymdastyrylyp otyr. Búginde halyqaralyq qaýymdastyqtyń kókeıkesti máselelerin sheshýdiń ózinshe bir ortalyǵyna aınalǵan BUU-nyń Qazaqstandaǵy Damý baǵdarlamasy kórkemóner kásibin jańǵyrtý maqsatynda 2014 jyldan beri 100-den astam qolónershige qoldaý kórsetip keledi.
Aıa О́MIRTAI,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
