Alǵashqy kezeńde Qaraǵandy oblysy jergilikti óndirýshilerdiń qurylys materıaldaryn jetkizý, EKSPO nysandaryn salý boıynsha jobalyq uıymdar men qurylys kompanııalarynyń jumysyn júzege asyrýmen aınalysty.
Nátıjesinde, aımaqtaǵy 29 kásiporyn 9,5 mlrd teńge kóleminde ónim jetkizip, 7 kásiporyn 257,5 mln teńge somasynda qyzmet jumystaryn oryndady.
EKSPO kórmesin tamashalaýǵa kelgen sheteldik qonaqtarǵa aqparattyq qyzmet kórsetý úshin Qaraǵandy oblysynyń JOO-nan úsh tilge jetik, mádenı-buqaralyq is-sharalar júrgizýde mashyǵy bar 250 erikti tańdalyp alyndy.
Álem nazaryn tigip otyrǵan «EKSPO-2017» Halyqaralyq kórmesine Qaraǵandy oblysynyń turǵyndary osy kúnge deıin 90 myń bılet satyp alǵan. Bul týraly aımaqtyq ortalyq kommýnıkasııalar qyzmetiniń alańynda ótken baspasóz máslıhatynda Qaraǵandy oblysy kásipkerler basqarmasynyń basshysy Tatıana Ablaeva málimdegen bolatyn.
Aımaq jurtshylyǵy arasynda álemdik sharaǵa qyzyǵýshylyq kún sanap artyp keledi. Ony osy kúnge deıingi resmı málimetter rastaıdy. Sonymen qatar, el ishinde kórmege erikti túrde qatysamyn deýshilerdiń qarasy az emes. Jalpy, Qaraǵandy oblysynan álemdik sharaǵa 200 myń adam qatysady dep boljam jasalýda. Bıýdjet qarajaty esebinen 3750 oqýshynyń qatysýyn qamtamasyz etý josparlanǵan. Iаǵnı, 12 maýsym men 6 shilde aralyǵynda 1050 daryndy bala jáne balalar úıiniń tárbıelenýshileri kórmeni oblystyq bıýdjet esebinen baryp tamashalaıtyn bolady. Al 10 shilde men 10 qyrkúıek muǵdarynda kórmege jergilikti bıýdjet esebinen aýdandar men qalalardyń jalpy bilim beretin mektepterinen 2700 áleýmettik az qamtylǵan daryndy oqýshylar qatyspaq.
Kórmeni ótkizý barysynda óńirdiń aýyl sharýashylyǵy 8964 tonna azyq-túlik taýaryn óndirý jáne jetkizýdi josparlap otyr. Sondaı-aq, osy jyldyń 4-9 qyrkúıegi aralyǵynda Qaraǵandynyń mádenıet kúnderi sheńberinde oblystyq mádenıet, muraǵattar jáne qujattama basqarmasy tarapynan 21 mádenı-saýyqtyq is-shara uıymdastyrý kózdelýde.
«EKSPO-2017» Halyqaralyq kórmesi – otandyq týrızmdi túletýdiń jańa bir múmkindigi bolmaq. Aldaǵy ýaqytta elimizge Jer sharynyń túkpir-túkpirinen 2 mıllıonnan astam qonaqtar kelse, onyń 300 myńdaıy sheteldikter bolady dep kútilýde. Osy rette, Qaraǵandynyń tańǵajaıyp tabıǵaty men tarıhı oryndaryn tamashalaýǵa kelgender úshin «Nomadic Travel Kazakhstan», Qarqaraly memlekettik ulttyq-tabıǵı parki, «Pavlın-Týr» týroperatorlary daıyndaǵan «Qazaq dalasynyń Jeruıyǵy», «Qyzylaraı: baǵzydan – bıikke», «Qarqaraly – Saryarqanyń sándi alqasy», «Temirtaý – metallýrgter qalasy», «Qazaqstannyń jańa paraqtary: Astana-Qaraǵandy» týrıstik baǵyttary qyzmet kórsetpek.
Jalpy, Qaraǵandyǵa at basyn burǵan, sondaı-aq, atalmysh kórme qonaqtarynyń jaıly ornalasýyn qamtamasyz etý maqsatynda nómirlik qordy keńeıtý jáne jetildirý jumystary júrgizildi.
2015 jyldan beri Kenshiler astanasynda jalpy somasy 3,5 mlrd teńgeni quraıtyn ornalasý nysandaryn salý jáne qaıta jóndeý boıynsha 23 joba júzege asyrylǵan.
Mıras ASAN,
«Egemen Qazaqstan»
