Munda Astana, Almaty baǵyttary boıynsha ushaqtar qatynap kelse, budan bylaı Shymkentke de aıqara jol ashylyp otyr. Onyń alǵashqy jolaýshysy retinde mektep oqýshysy Aısulý Erlikqyzy tirkeldi. Áke-sheshesin qatty saǵynǵany túrinen de, sózinen de bilinip turdy. Buryn poıyzben táýliktep saparlasa, endi otbasyna tez-aq jete alady. Aıtolla Ýashev te qatty qýanýly. Densaýlyǵy dimkás jan bıyl Saryaǵash shıpajaıyna jetý úshin kóp mehnat kóripti. Netken raqat, deıdi mıyǵynan kúlip.
Barlyq talaptarǵa saı jabdyqtalǵan 50 oryndyq «Sırdjeı-200» ushaǵy Shymkent qalasyna aptasyna eki ret qatynaıdy. Bılettiń baǵasy – 20 myń teńge. Júrdek poıyz «Talgoǵa» qaraǵanda arzan. Ekinshiden, aralyq ýaqyt 9 esege deıin qysqarady. Búgin ushaq lyq toly. Soǵan qaraǵanda, úmit aqtalady degen senim basym. О́ıtkeni, «Serpin»-2050» baǵdarlamasy boıynsha ońtústik jaqtardan jastar kóp oqıdy. Onyń ústine, ishki kóshi-qon úderisin retteý jónindegi Úkimet baǵdarlamasyna oraı kóship kelýshiler de, sonymen birge demalýshylar qatary da qalyń. Osy jaıttar jan-jaqty eskerilgen, deıdi mekemeniń dırektory Marat Hasenov.
Jolaýshylarǵa «Skat» avıakompanııasy qyzmet kórsetedi.
О́mir ESQALI,
«Egemen Qazaqstan»
Soltústik Qazaqstan oblysy
