Kóktem kelip, kún jylyna basy tolatyn baqbaqty úlbiretip sán retinde taǵýǵa da bolady eken. Astanalyq Natalıa Ponomarevanyń tumsa tabıǵatty syıdyrǵan kishkentaı áshekeılerine qarap turyp kóktem qaıta týǵandaı áserde qaldyq. Alqa gúlder tuqymdasyna jatatyn ýly ıtjıdek te móldir shynynyń ishine momaqan qalypta syıyp ketipti. Odan bólek biteýgúl, raýshan men ártúrli baqsha gúlderi de syrǵa men saqına bolyp shyǵa kelgen.
– Reseılik sheberlerdiń zergerlik shaıyrdan jasalǵan buıymdaryn ınternetten kórip, qatty qyzyqtym. Otbasymyzben osy salaǵa áýestenip kettik. Tabıǵat aıasyna shyǵa qalsaq boldy, erekshe shópter men gúlderdi jınap júretin boldyq, – degen sheber buıymdaryn negizinen qalalyq jármeńkelerge shyǵarý arqyly satatynyn aıtty. Mundaı áshekeılerdi jasaý úshin epoksıdti shaıyrdy belgili bir formaǵa keltirip, quıý arqyly jasalady. Sapaly jasalǵan buıym birneshe jylǵa deıin saqtalady.
Jármeńkege arnaıy kelgen BUU-nyń «EKSPO-2017» bas komıssary Jıhan Sultanoǵly qoldanbaly óner sheberleriniń jetistikteri men múmkindikteri týrasynda aıta kelip, ónerdiń barshaǵa ortaq ekenin jetkizdi.
– О́z elderińizdiń tarıhy men sulýlyǵyn túster alýandyǵy men shyǵarmashylyqtaryńyz arqyly pash etesizder. Shyn mánisinde óner – ortaq, ony jas ta, kári de túsinedi, – deıdi Jıhan Sultanoǵly. Bas komıssar kópshilikti jármeńkege qatysýǵa shaqyryp, sheberlerdiń isine sáttilik tiledi.
Qyzylordalyq Aısulý Sadyqovanyń adamdar men janýarlardy, tabıǵat elementterin beıneleıtin oıynshyqtar jasap kele jatqanyna 12 jyldan asqan. Onyń qolynan shyqqan «Baıdyń qyzy» atty qýyrshaqtyń poshymynan ómirden qıyndyq kórmegen erketotaı qyzdyń dúńk etpe minezi birden baıqalady. Onyń aıtýynsha, keıipker beınesin jasaýda kóbine qazaq halqynyń ańyz-áńgimelerine, qııal-ǵajaıyp ertegilerine júginedi.
– Ákem aǵashtan túıin túıetin sheber. Ul bala joq bolǵandyqtan, kishkentaıymnan ákeme kómektesip júrip, qyr-syryna qanyǵyp óstim. Kórmege qatysyp júrgende kıizden oıynshyqtar jasaýǵa bolatynyn kórip, osy salaǵa oıysa bastadym. Qazir Túrkistan qalasynan qolóner buıymdary dúkenin ashyp jatyrmyn, – degen Aısulý qýyrshaq jasaýdyń qıyn emestigin aıtady.
Aıa О́MIRTAI,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»
