Osyndaı kezeńdi bastan ótkerip jatqan jas sarbazymyzdyń biri – Atyraý garnızonynyń 41433 áskerı bólimine byltyr kúzgi naýqanda shaqyrylyp, ásker sapyna alynyp, Otan aldyndaǵy boryshyn ótep júrgen qatardaǵy jaýynger Bekmurat Nurserik.
Úlken ómir jastardan jaýapkershilikti sezinip, durys sheshim qabyldaý men belgilengen zań men tártipke baǵyný, ujymda jumys isteı bilý talap etiledi. Al osy qasıetterdiń barlyǵy merzimdi áskerı qyzmettiń alǵashqy aıynda ant qabyldaý qarsańynda qalyptasa bastaıdy. Sarbaz Bekmuratqa bul kezeń beıimdelýdiń ǵana emes, ózin qaıta tanyp-bilýdiń ýaqytyna aınalǵan.
Áskerı qyzmettiń alǵashqy aıy – jas sarbaz úshin asa mańyzdy kezeń. Dál osy aralyqta ol áskerı tártiptiń qatań, biraq ádiletti talaptarymen betpe-bet keledi. Alǵashqy kúnderdegi belgisizdik pen ishki alańdaýshylyq kóp uzamaı naqty maqsat pen senimge ulasqanyn jas sarbaz jasyrmaıdy.
«Áskerge kelgen alǵashqy kúnderi árkim óz oıymen arpalysady. Alaıda kún tártibi, komandırlerdiń talapshyldyǵy men qamqorlyǵy adamdy tez jınaqtaıdy. Ýaqyttyń qadirin, tártiptiń shyn mánindegi kúsh ekenin dál osy jerde túsindim», deıdi Bekmurat.
Alǵashqy aıda ol jas jaýynger kýrsynan ótti. Bul – áskerı qyzmetke bastar alǵashqy baspaldaq. Saptyq daıarlyq, áskerı jarǵy talaptary, qarý-jaraqty, tehnıkany qalaı kútip ustaý kerek, qalaı atýdy úırený kerek, jeke jáne ujymdyq qaýipsizdik erejeleri – barlyǵy naqty josparmen, júıeli túrde úıretiledi. Munda árbir buıryq – jaýapkershilikke, árbir tapsyrma senimge negizdelgen.
Áskerdegi kún tártibi jas sarbazǵa ózin-ózi basqarýdyń jańa deńgeıin kórsetedi. Belgilengen ýaqytta turý, daıyndyqqa qatysý, qoıylǵan is-sharalardy múltiksiz oryndaý – munyń barlyǵy búgingi qoǵamda asa qajet tártip pen tózimdilikti qalyptastyrady. Jas sarbaz Bekmurat bul jerde jeke múddeden góri ujymdyq jaýapkershiliktiń mańyzyn tereń túsingenin aıtady.
Áskerı bólimdegi baýyrmal orta – alǵashqy aıdyń taǵy bir úlken sabaǵy. Eldiń ár óńirinen kelgen, minezi men ómirlik tájirıbesi ártúrli jastar qysqa ýaqyt ishinde ortaq maqsatqa birigip, naǵyz qarýlas dostarǵa aınalady. «Áskerde jalǵyzdyqpen joldas bolmaısyń. Qasyndaǵy jaýyngerlik joldasyń – seniń tiregiń. Jaýyngerler bir-birimizge senýdi, bir maqsat úshin áreket etýdi úırenedi», deıdi keıipkerimiz.
Beıimdelý kezeńinde sarbazdardyń psıhologııalyq jaǵdaıyna da erekshe kóńil bólinedi. Qazirgi qoǵamda jastardyń ishki psıhologııalyq turaqtylyǵy – jıi sóz bolatyn ózekti másele. Osy turǵyda áskerde kórsetiletin moraldyq qoldaý, komandırler men áskerı tárbıeshilerdiń qamqorlyǵy aıryqsha orynǵa ıe.
Bekmurat «komandır – aǵa, sarbaz – ini» degen sózdiń ómirlik ustanymy ekenin maqtanyshpen aıtady. «Komandırler tek pármen berýmen ǵana emes, qıyn sátte baǵyt kórsetip, kúsh-jiger beredi. Áskerde júrgen shaǵymyzda adamgershilik pen ádildiktiń naqty úlgisin kórip júrmin», deıdi jaýynger.
Ant qabyldaý sátine deıingi alǵashqy aı búgingi tańdaǵy qyzmetke beıimdelgen Bekmurat úshin úlken ishki ózgerister kezeńi boldy. Ol áskerı istiń negizderin meńgerip qana qoımaı, jaýapkershilik, tártip pen Otan aldyndaǵy boryshtyń shynaıy maǵynasyn sezindi.
Bul – keshegi erkin ómirge úırengen jastyń el qorǵany bolýǵa jasaǵan alǵashqy sanaly qadamy. Al Bekmurat Nurseriktiń alǵashqy aıdaǵy ustanymy men kózqarasy – áskerı qyzmettiń búgingi qoǵam úshin de ózektiligin aıqyn kórsetetin naqty mysal.
