Parlamenttik saılaýdyń ekinshi týrynyń qorytyndysy boıynsha, «Alǵa, respýblıka!» partııasy óziniń odaqtasy «Demokratııalyq qozǵalys» partııasymen birge eldiń tómengi palatasyndaǵy 577 orynnyń 300-ine otyrý quqyǵyna ıe boldy.
Saıasatkerler, degenmen, Makronnyń partııasy budan da jaqsy kórsetkishke jetedi dep boljaǵan edi. Qalaı bolǵanda da, prezıdent partııasy parlamentte aıtarlyqtaı rólge ıe bolyp, Makronnyń bıznes reformalaryn júrgizýine jaǵdaı jasamaq.
Halyqtyń saılaýǵa qatysý deńgeıi 2012 jylǵy kórsetkishten anaǵurlym az boldy. Makron partııasynyń saılaýdyń birinshi týrynda aıqyn basymdyqpen jeńgennen keıin ony jaqtaýshylar da, oǵan qarsy halyq ta saılaýǵa kelmeı qoıǵanǵa uqsaıdy. Le Penniń pikirinshe, saılaýǵa halyqtyń az jınalýy eldiń saılaý júıesine reforma jasaýdyń qajettiligin kórsetedi.
El premer-mınıstri Edýar Fılıpp saılaýshylar sanynyń mardymsyzdyǵyn aıta otyryp, onyń partııasy barsha fransýz jurty úshin tańdaý jasaıtynyn málimdedi.
Konservatıvti «Respýblıkashylar» partııasy men onyń odaqtastary saılaý qorytyndysy boıynsha eń iri oppozısııalyq blok qura alady. Olar parlamenttiń tómengi palatasynyń 125-ten 131-ge deıingi ornyna ıelik etpek. Degenmen, bul osyǵan deıingi parlamenttegi oppozısııalyq bloktyń sanynan anaǵurlym az. Ol kezde oppozısııa ókilderi zań shyǵarýshy orǵannyń 200 mandatyna ıelik etken edi.
Sońǵy bes jylda el bıliginde bolǵan sosıalıster bar bolǵany 41-den 49 mandatqa deıin ala almaq. Bul partııa tarıhyndaǵy eń az kórsetkish.
Al prezıdenttik saılaýda Makronnyń basty básekelesi bolǵan Marın Le Pen el bıligine talasta jeńiske jetpegenimen, parlamenttik saılaýda aıtarlyqtaı jetistikke jetip otyr. Onyń «Ulttyq front» partııasy alǵash ret tómengi palataǵa saılanyp, tórtten segiz mandatqa deıin ıelik ete alatyn boldy.
Esterińizde bolsa, 2016 jyldyń sáýir aıynda Makron «Alǵa, respýblıka!» partııasyn qurǵan edi. Partııa quramynyń jartysyna jýyǵy saıası arenada tájirıbesiz. Prezıdenttik saılaýda da Makronnyń jeńisine kúmánmen qaraǵandar onyń úlken saıasattaǵy tájirıbesizdigi men onyń parlament qabyrǵasynda qoldaýshysynyń joqtyǵyn alǵa tartqan edi.
Bul saılaýda Fransııa saıasatynda burynnan kele jatqan «kári» partııalar halyqty Makronnyń partııasyn qoldaýǵa úgittedi. Sarapshylardyń pikirinshe, ondaǵy maqsat bıliktiń monopolııalanyp ketýiniń aldyn alý.
«Alǵa, respýblıka!» partııasy parlamentke ómirdiń ár túrli salasyndaǵy azamattardy usynyp otyr. Olardyń arasynda tipti zeınetkerler men stýdentter bar. Árıne, kópshiligi úlken saıasatpen tanys emes. Úmitkerlerdi irikteý jumystary elektrondy poshta arqyly kelip túsken túıindemeler negizinde júrgizilgen.
Baýyrjan MUQANOV,
«Egemen Qazaqstan»
