Jańa kásiporyn qazaqstandyq munaı hımııasy ónimderin shyǵarmaq. Bul ónimder munaı-gaz sektorynda qyzmet etýshi kompanııalardyń qajetin óteıtin bolady. Iаǵnı zaýytta munaı men sýdy tazartýǵa arnalǵan qospalar, munaı-gaz salasyndaǵy tehnologııalyq qural-jabdyqtyń paıdalaný merzimin uzartyp, qorǵaıtyn hımııalyq ónimder shyǵatyn bolady.
Alıreza Saıed Hoseınıdiń aıtýynsha, jańa kásiporynda zamanaýı qondyrǵylar ornatylyp, qorshaǵan ortaǵa zalalsyz, ekologııalyq lastaýsyz jumys isteıtin bolady. Jaqyn kúnderi kompanııanyń óndiris alańynda munaı reagentterin sıntezdep, tasymaldaýǵa daıyndaıtyn seh salynbaq. Qazirdiń ózinde sý men munaı negizindegi tehnologııalyq eritindilerdi shyǵaratyn blendıng sehynyń ınjınırıngi tolyq ázir. Rezervýar parki, saqtaýshy qoımalar jáne hımııalyq zerthana jobasy daıyn.
– Jańa jobamyzǵa alǵashqy jyly 2 mlrd teńge ınvestısııa quıǵaly otyrmyz. Bul – joǵary tehnologııaly óndiris bolmaq. Zaýytta jylyna 5 myń tonna arnaýly hımııalyq ónim shyǵarylatyn bolady, – deıdi ırandyq kásipker.
Kásiporyn jumysyn basqaryp, qurylys barysyn baqylaý úshin Alıreza myrza jaqynda Oral qalasyna kóship kelmek eken. Kompanııanyń damý boıynsha dırektory Ǵaısa Jumalıevtiń aıtýynsha, jańa zaýyt taıaý arada munaı-gaz kompanııalaryn Qazaqstanda óndirilgen joǵary sapaly hımııa ónimderimen qamtamasyz etetin bolady. Batys Qazaqstan oblysynyń geografııalyq jaǵynan yńǵaıly ornalasýy ónimdi tasymaldaý shyǵynyn edáýir azaıtady. Kompanııa taıaý bolashaqta EAEO elderiniń naryǵyna ónim shyǵarýdy da josparlap otyr.
Jobanyń ınvestory retinde tanystyrylǵan ırandyq Honsarı Mohammad Alı munaı-gaz hımııasy ónerkásibi salasynda 50 jyldyq tájirıbesi bar kásibı maman eken. Jańa joba úshin qarjysy men tájirıbesin qatar salyp otyrǵan ınvestor birlesken kásiporynnyń bolashaǵy jarqyn bolady degen oıyn bildirdi.
Qurylysy Oral qalasynyń irgesindegi Jelaev kentiniń óndiristik aýmaǵynda ornalasatyn jańa zaýytta 50-diń ústinde adam turaqty qyzmet jasaıtyn bolady. Ǵaısa Álibekuly alǵashqy kezde zaýytta keıbir sheteldik mamandar qyzmet etkenimen, keıin olardyń ornyna otandyq mamandar oqytylyp, almastyrylatynyn aıtady.
– «QazChem» kompanııasynyń ónimderi osy kezge deıin shet elden alyp kelgen ımporttyń ornyn almastyratyn bolady. Biz Reseı naryǵyna da shyǵýdy kózdep otyrmyz, – deıdi Ǵaısa Jumalıev.
Qazbek QUTTYMURATULY,
«Egemen Qazaqstan»
ORAL
