Bekitilgen jospar úsh baǵyt boıynsha 36 is-sharany qamtıdy – uıymdastyrý sharalary, aqparattyq-túsindirý jumystary jáne Konstıtýsııanyń oryndalýyn quqyqtyq qamtamasyz etý.
Bul baǵytta Konstıtýsııa mátinin basyp shyǵarý jáne taratý qarastyrylǵan. Sonymen qatar, múgedektigi bar adamdar úshin qoljetimdi formattar ázirlenedi, al Negizgi zań elektrondy platformalarda ornalastyrylady.
Budan bólek, ǵylymı-saraptamalyq súıemeldeý, aqparattyq-kórneki materıaldar ázirleý, kórmeler men aǵartýshylyq jobalardy uıymdastyrý kózdelgen. Maqsat – Konstıtýsııany tek quqyqtyq qujat retinde ǵana emes, qoǵamnyń kúndelikti ómirine jaqyn qural retinde tanytý.
Úı ıesiniń quqyǵy sózsiz basymdyqqa ıe: Sarapshy jańa Konstıtýsııanyń 28-shi babyn taldap berdi
Jospar sheńberinde halyqtyń quqyqtyq mádenıetin kóterýge erekshe kóńil bólingen. Atap aıtqanda:
- oqytý semınarlary men bilim berý is-sharalaryn ótkizý
- mektep jáne joǵary oqý oryndarynyń baǵdarlamalaryn jańartý
- «Quqyq negizderi» jáne «Zań men tártip» kýrstaryn jetildirý
- ádistemelik materıaldar men balalarǵa arnalǵan basylymdar ázirleý
Bul sharalar jas urpaqtyń quqyqtyq saýattylyǵyn júıeli túrde qalyptastyrýǵa baǵyttalǵan.
Jańa Konstıtýsııa – jastardyń el damýyna naqty yqpal etý kezeńin bastaıdy
Jospardyń mańyzdy bóligi – aqparattyq-túsindirý baǵytyndaǵy keshendi medıa-jospar. Onyń sheńberinde Konstıtýsııa normalaryn halyqqa jan-jaqty túsindirý úshin túrli kommýnıkasııalyq quraldar qoldanylady.
Sonymen qatar, Konstıtýsııany iske asyrýdy quqyqtyq turǵyda qamtamasyz etýge baǵyttalǵan sharalar qarastyrylǵan. Bul baǵytta zańnamalyq ózgeristerdi júzege asyrý, qoldanystaǵy zańdardy taldaý jáne Negizgi zań normalaryna sáıkes strategııalar men tujyrymdamalardy jańartý kózdeledi.
Jalpy, bekitilgen jospar Konstıtýsııa normalaryn qoǵam arasynda keńinen túsindirýge jáne olardyń tolyqqandy oryndalýyn qamtamasyz etýge baǵyttalǵan.
