Aýdan ortalyǵynda 2001 jyldan bastap «Dostyq» úıi shańyraq kóterip, keıin ol ulttyq-mádenı ortalyq bolyp qaıta quryldy. Bul ortalyqtyń tóraıymy Besaıdar Alashqyzy kórshi Baıan-ólke aımaǵy jáne Shyǵys Qazaqstan oblysymen tyǵyz qarym-qatynas ornatqan. Sonymen birge, Naýryz jáne ózge de ulttyq-dinı meıramdardy óz deńgeıinde ótkizýge uıytqy bolyp keledi.
Sonymen qatar, aýdandaǵy mádenı jańalyqtardy halyqqa jetkizip otyratyn «Shúı nury» atty gazet shyǵarylýda. Sonymen birge, ulttyq-mádenı ortalyqtyń qasynan etnografııalyq baǵytta án aıtatyn «Kerýen» jáne «Mıras» sekildi ansamblder jumys istep tur. Sońǵy jyldary ulttyq-mádenı ortalyq qazaqtyń qolóner sheberligin qaıta jańǵyrtý maqsatynda shaǵyn sheberhana ashty. Búginde sheberhananyń shyǵarǵan qolóner buıymdary túrli kórmelerge qoıylyp keledi.
Dese de, bizdi alańdatyp otyrǵan dúnıe – qazaq tili máselesi. Aýdan boıynsha qazaq tili tek fakýltatıvti pán retinde oqytylǵany bolmasa, basqa sabaqtar túgeldeı orys-altaı tilderinde júrgizilýde. Osy oraıda, Qosaǵash aýdanyna kómek qolyn sozatyn eń yńǵaıly múmkindik – irgeles ornalasqan Shyǵys Qazaqstan oblysymen mádenı-rýhanı qatynas ornatýdy qolǵa alsa, abzal bolar edi.
Amanjol SAHARIаNOV,
Altaı Respýblıkasy Qosaǵash aýdany máslıhaty tóraǵasynyń orynbasary (Reseı)
