− Jalpy, eń úlken toı Dúnıejúzi qazaqtarynyń I quryltaıy naǵyz aq túıeniń qarny jarylǵan uly jıyn bolyp edi. Bul jıyn jaıly kezinde biraz jazdym. Endi oılap otyrsam, ol toı álem qazaǵynyń Táýelsizdik alǵanymyzǵa shattanǵan aǵyl-tegil qýanyshy eken ǵoı. Sodan beri, mine, besinshi quryltaıdyń da ýaqyty kelipti. Bylaı qarap otyrsańyz, jyl saıyn qandastarymyz turatyn Túrkııa, Eýropa, Reseı syndy ózge elderde kishi quryltaı ótedi de, araǵa bes jyl salyp úlken quryltaı úlken úı – Qazaqstanda ótedi. Munyń ózi tamasha oılastyrylǵan dúnıe.
Ekinshi bir aıtaıyn degenim, qaıbir jyly Germanııada ótken kishi quryltaıǵa qatysyp, keler jyly Shvesııada ótken kezekti kishi quryltaıǵa barsam, sol jıynnyń tórinde Shárip Naıman degen aqsaqal aǵam otyr. Ol kisi sol jerdegi qazaqtyń qyzyna quda túsip kelip otyr eken. Sóıtsek, eki jas ótken jylǵy kishi quryltaıda Mıýnhende tanysypty. Sóıtip, jastardyń úılený toıyna qatysyp qaıtqanymyz bar. Demek, bıylǵy quryltaıǵa jastardyń kóp kelýi, bir-birimen tanysýy bolashaqta aǵaıyndyqqa, qudandaly bolýǵa jol ashady eken.
Álibek Asqar, jazýshy
