Darhan Qydyráli Prezıdent Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynyń Qazaqstannan tysqary shetelderde úlken serpilis týdyrǵanyn aıta kelip, bul rette «Ultymyzdyń rýhyn asqaqtatyp, sanasyna serpin bergen bul baǵdarlama búginimizdi bútindep, baıandy bolashaǵymyzdy bekemdeýdiń berik qazyǵyna aınaldy. Barshaǵa baǵdar bolǵan bul baılamdy bátýaǵa qazaq balasy túgel atsalysýǵa tıis dep oılaımyz. Osy oraıda, mádenı jaýharlarymyzdy jahanǵa júıeli tanytý maqsatynda shet elderde, ásirese, dıaspora shoǵyrlanǵan elderde arnaıy ortalyqtar ashylsa degen tilegimiz bar. Bul arqyly qasterli qazaq tili de qulashyn keńge jazyp, tuǵyryn bekite túsedi dep paıymdaımyz», dedi basqarma tóraǵasy.
«Kúńirenip kún túbine jortqan Kúlteginge uran bolǵan kók bóri Súıinbaı jyrynda bórili baıraq bolyp qaıta kóterildi! Sondyqtan, Qazaq eli búkil Túrki áleminiń jáne kúlli kóshpeli órkenıettiń murageri retinde moıyndalyp otyr. Birneshe memlekettiń enshisinde jatqan Altaıdyń tórt tarapyn da qazaqtardyń mekendeıtini osynyń aıqyn aıǵaǵy ispetti. Endeshe, Qazaq álemin dúnıejúzine tanytý arqyly biz tamyrlas jurttyń qundylyqtaryn túgendeı túsemiz degen oıdamyz», dep sózin túıindedi «Egemen Qazaqstan» gazetiniń basshysy.
Jıyn barysynda shetelderdegi qazaq dıasporasynyń mádenı-rýhanı jáne aqparat quraldary jónindegi muqtaj máseleleri men etnıkalyq kóshi-qonnyń áleýmettik sıpaty, ózekti jaıttary kóterilip, olardy sheshý jóninde birqatar naqty usynystar aıtyldy. Bul rette Memleket basshysy atajurtqa kóship kelýge yntaly azamattarǵa zańdyq-quqyqtyq jaǵynan jeńildikter jasaý qajettigin eskertti. Memleket basshysy qazaq dıasporasyna qatysty ózekti máselelerdiń josparly sheshimin usyna otyryp, Úkimettiń, tıisti mınıstrlikter men oblystyq ákimdikterdiń mindetterin belgiledi.
