Elbasy jıynǵa qatysýshylardy aıtýly kúnmen quttyqtap, dál osy kúni shırek ǵasyr buryn Qazaqstan Respýblıkasy ishki ister organdarynyń qurylǵanyn atap ótti.
- Bul Táýelsizdigimizdiń bastapqy kezeńiniń aıtýly qadamy boldy. Ishki ister organdarynyń qalyptasý tarıhy memleketimizdiń damý tarıhymen tyǵyz baılanysty, - dedi Nursultan Nazarbaev. Memleket basshysy Qazaqstan polısııasynda jankeshtilik pen erlik úlgilerin kórsetkender az emes ekenin aıtty. - Olar qylmyspen kúreste aldyńǵylardyń qatarynan tabylyp, azamattardyń quqyqtary men bostandyqtaryn birinshi bolyp qorǵaıdy. Sońǵy jyldary qyzmetterińizdiń nátıjeleri aıqyn kórinýde. Byltyrǵy jylmen salystyrǵanda qylmys jasaý 15 paıyzdan asa azaıǵan. Aýyr jáne asa aýyr qylmystardy ashý kórsetkishi 72 paıyzǵa jetti. Qala men aýyl kóshelerindegi turǵyndardyń qaýipsizdik deńgeıi aıtarlyqtaı artty. Onda qylmys jasaý 14 paıyzdan asa azaıdy, - dedi Qazaqstan Prezıdenti.
Sonymen qatar, Elbasy jahandyq turaqsyzdyq jaǵdaıynda bılik ókilderi - polısııaǵa degen senim erekshe mańyzǵa ıe bolyp otyrǵanyna nazar aýdardy.
- Sizder qyzmettik paryzdy múltiksiz atqarǵanda ǵana qoǵam men memlekettiń jańǵyrýy júzege asady. Sondyqtan biz qazir qabyldanǵan baǵdarlamalardyń aıasynda qurylymdardy qaıta qurý jóninde jumystar júrgizip jatyrmyz. Sonyń nátıjesinde jergilikti polısııa qyzmeti quryldy. Zańdylyqtyń, azamattardyń quqyqtary men bostandyqtarynyń saqtalýyn qatań baqylaýǵa alý qajet. Bul - elimizdiń ornyqty ári turaqty damýynyń basty faktorynyń biri. Sondaı-aq, zamanaýı turǵyda tıimdi polısııa qyzmeti memleket pen halyqtyń básekege qabilettiligin arttyrýǵa septigin tıigizedi, - dep túıindedi Nursultan Nazarbaev.
Budan bólek, Memleket basshysy joǵaryda kórsetilgen strategııalyq mindetterdiń iske asyrylýyn qamtamasyz etý úshin 2017 jylǵy 1 shildeden bastap ishki ister organdary qyzmetkerleriniń eńbekaqysyn 25 paıyzǵa ósirý jóninde sheshim qabyldanǵanyn aıtty.
- Jurt sizderge qarap, memlekettik bılik týraly pikir qalyptastyrady. Sol sebepti, polısııa qyzmetkeri barshaǵa úlgi bolýǵa tıis. Qazaqstan polıseıleri aldaǵy ýaqytta da bar kúshin, tájirıbesi men qýatyn abyroıly paryzdy sátti oryndaýǵa jumsaıtynyna senimdimin, - dedi Qazaqstan Prezıdenti.
Nursultan Nazarbaev kezdesýde Ishki ister mınıstrligi arnaıy maqsattaǵy bólimshesiniń ınspektory B.Dúısenovti I dárejeli «Aıbyn» ordenimen, Pavlodar oblysy Ishki ister departamentiniń Sharbaqty aýdandyq ishki ister bóliminiń bastyǵy J.Muqatovty II dárejeli «Aıbyn» ordenimen, Ońtústik Qazaqstan oblysy Ishki ister departamentiniń Ordabasy aýdandyq ishki ister bóliminiń bastyǵy Q.Sahovty II dárejeli «Aıbyn» ordenimen, Astana qalasy Ishki ister departamentiniń Tergeý basqarmasynyń asa mańyzdy ister jónindegi aǵa tergeýshisi V.Shýtkony II dárejeli «Aıbyn» ordenimen, Ishki ister mınstrligi Qylmystyq-atqarý júıesi komıtetiniń asa mańyzdy ister jónindegi aǵa ýákili A.Ǵalıevti «Erligi úshin» medalimen, Almaty oblysy Ishki ister departamentiniń jedel-krımınalıstik basqarmasynyń bastyǵy L.Kımdi «Erligi úshin» medalimen marapattady. Qazaqstan Respýblıkasynyń Qurmet gramotasymen Aqtóbe qalasy Ishki ister basqarmasynyń ýchaskelik polısııa ınspektory S.Baltambekova, Aqtaý qalasy Ishki ister basqarmasynyń ýchaskelik polısııa ınspektory E.Joldasov jáne Qaraǵandy qalasy Ishki ister basqarmasy arnaýly mekemesiniń polıseıi N.Redchenko marapattaldy. Sońynda Qazaqstan Prezıdenti kezdesýge qatysýshylarǵa alǵys aıtyp, zor densaýlyq, baq-bereke jáne jaýapty qyzmetterine sáttilik tiledi.
