Týrnırdi senator Darhan Káletaev quttyqtaý sózben ashty.
«Baılanys jáne aqparat salasy qyzmetkerleriniń kúni qarsańynda elimizdiń jetken jetistikterin, Parlament jumysyn, saıası, áleýmettik-ekonomıkalyq reformalardy halyqqa jetkizýdegi Sizderdiń eńbekterińiz erekshe ekenin rızashylyqpen atap ótkim keledi» - dedi senator. - Ústel tenısinen jýrnalıster arasyna ótken jarys tartysty ári qyzyqty shara boldy. «Sport» – aǵylshyn tilinen aýdarǵanda «oıyn, kóńil kóterý» degendi bildiredi. Oı eńbeginiń maıtalmandaryna búgin óz sheberlikterin tanytýǵa ári merekede kóńil sergitýge múmkindik týdy, - dedi senator.
Senat depýtaty jýrnalıstıka – oı eńbegi, al sport – sergektik pen densaýlyq kepili ekenin aıta kelip, onyń adamdardy birlese qımyldaýǵa, jeńiske umtylýǵa, aýyzbirshilikke baýlıtyn shara ekenin aıtty. «Bul jaǵynan bári birlese qımyldap, halyqqa jedel ári sapaly aqparat beretin redaksııa jumysyna uqsaıdy. Ekeýi de qajyrlylyq pen tabandylyqty qajet etedi. Ekeýi de jeńiske umtylady», - dedi ol.
- Kásibı merekege oraı uıymdastyrylyp otyrǵan sporttyq sharanyń jeńimpazdaryn quttyqtaımyn. Sizderge myqty densaýlyq, shyǵarmashylyq tabys tileımin, - dedi senator. Halyqaralyq «QazAqparat» aqparat agenttiginiń fototilshisi Dáýren Ybyraıymov Parlament Senaty týrnıriniń jeńimpazy ári kýbogynyń ıesi atandy. Jýrnalıstıka ardageri, pýblısıst Qaınar Oljaı ekinshi oryn, Respýblıkalyq «Qazaqstan» teleradıokorporasııasy úshinshi oryn aldy.
