«Kitaphana» art-galereıasy men Áýezhan Qodar atyndaǵy zııatkerlik klýby qazaqstandyq art-qaýymdastyqtyń týyndylaryn kópshilikke keńinen tanystyrý maqsatynda ótken kórmede taqyryby, janry jáne stıli san alýan sýretshilerdiń aıryqsha týyndylary kópshilik nazaryna usynyldy. Otandyq alty birdeı avtordyń keskindeme, grafıka, kestelengen kartına, sándik-qoldanbaly óner sııaqty dástúrli beıneleý óner túrlerimen qatar, ınstallıasııa, somdaý sııaqty jańa túrleri de ónersúıer qaýymǵa tanystyryldy.
Qazaqstandyq beıneleý óneriniń talantty ókilderin tek elimizge ǵana emes, álemge de tanytý maqsatynda kóptegen is-sharalar atqaryla bastaǵanyn aıtqan «Kitaphana» art-galereıasynyń jetekshisi Dına Dospolova: «Qazirgi ýaqytta tek beıneleý ǵana emes, basqa da óner túrlerine, sol óner ıeleriniń ulttyq sıpattaǵy aıryqsha týyndylaryna degen kópshilik nazaryn halyqaralyq deńgeıge kóterý arqyly mádenıetimizben qatar, ekonomıkamyzdy da kótere túsýge múmkindik bar», dedi.
Kórmege jınalǵan qaýym týyndylary Parıjdegi áıgili Lývr murajaıynyń kórme zaldaryna qoıylǵan jas sýretshi-peızajıst, álemniń aıtýly baıqaýlarynyń jeńimpazy Anar Ábjanovanyń eńbekterimen qatar, ejelgi qazaq kestesiniń negizinde jańa óner túri sanalatyn «biz kesteni» oılap tabýshy Zeınelhan Muhamedjannyń da jumystaryn tamashalady. Sondaı-aq, sýretshi-zerger ári músinshi Serjan Bashırovtiń súıikti kompozısııalyq tásili – aǵashtardy túrli tásilmen ári qarama-qarsy faktýradaǵy kúmis, tas, súıektermen úılestire qoldanǵan eńbekteri de kelýshilerdiń ystyq yqylasyna bólendi.
Avtorlyq tehnıkasynyń arqasynda tanymal bolǵan keskindemeshi Orazbek Esenbaevtyń da qorshaǵan ortanyń dálme-dál kóshirmesin bere bilý qabileti, poetıkalyq shyǵarmashylyǵy ejelgi uıǵyr halqynyń sándik asqabaqtardan qýyrshaq jasaý ónerinen bastaý alatyn uıǵyr sýretshisi Hashım Qurbanov keskindemeleri, músinshi, dızaıner Arman Baımuratovtyń shyǵarmashylyq naqyshy, realızm men abstraksııanyń toǵysýynan týyndaǵan jumystary da kópshilikti tánti etti.
Mıra BAIBEK,
«Egemen Qazaqstan»
ALMATY
