Jarys aldynda týrnırdiń 2015 jyly «Kórermen kózaıymy» bolǵan qyzylordalyq balýan Nurym Sálimgereevten týrnır týraly pikirin suraǵan edik.
– 2015 jyly Nurym Sálimgereev «Qazaqstan barysy» týrnırinde jarq etip shyǵyp, joq bolyp ketti...
– Belgili bir sebepterge baılanysty sporttan birneshe aıǵa qol úzip qaldym. Naqty qandaı sebep ekenin aıtpaı-aq qoıaıyn. Sonymen qatar, sportshylardyń jaraqat degen balýandardan bólek taǵy bir «qarsylasy» bar. О́kinishke qaraı, 2016 jyly jaraqatyma baılanysty birqatar jarystarǵa qatysa aldym. Kórinbeı ketýimniń negizgi sebebi de osy edi.
– Bir jyldyq úzilisten soń «Qazaqstan barysyna» qaıta oraldyń. Osy jylǵy týrnırge jaqsy daıyndyqpen kelgen shyǵarsyń?
– Árıne. Babyma enip, 100 paıyz daıyn bolǵan soń keldim. Barsha Qyzylorda jurty maǵan senip, úmit artyp otyr. Buıyrsa, jankúıerlerimniń úmitin aqtaýǵa tyrysamyn.
– Kúresińdi qarasaq, bozkilemde qarsylasyńnan ımenbeı erkin kúreskenińmen, utylyp qalyp jatasyń. Nelikten?
– Kóp jaǵdaıda tájirıbeniń azdyǵynan qarsylastarymnan jeńilip qalamyn. Múmkin, jeńis buıyrmaǵan shyǵar dep ózimdi ishteı jubatyp qoıamyn. Sportta eń bastysy – tájirıbe ǵoı. Tájirıbemen jáne aıla-tásilmen barlyǵyn jeńýge bolady. Buıyrsa, bıyl bar kúsh-jigerimdi, osyǵan deıin jıǵan-tergen tájirıbemdi salyp kúresýge tyrysamyn.
– Senińshe bıyl kim jeńimpaz bolady?
– «Qazaqstan barysyna» barlyq balýan jeńemin dep keledi ǵoı. Eshkimniń jeńilgisi kelmeıdi. Degenmen, bári bir Allanyń qolynda. Men-men degennen esh paıda joq. Kimniń myqty ekenin bozkilemde anyqtaıtyn bolamyz.
Áńgimelesken
Abzal ORYNBASAR
