– Shalqar aǵa, qazaq kúresi ýaqytpen birge qarqyndy túrde qaryshtap damyp keledi. Siz kúresken kez ben qazirgi kúreste aıyrmashylyq baıqala ma?
– Men 2012 jyly kúrestim ǵoı. Sodan beri pálendeı bir ózgeris boldy dep aıta almaımyn. Bul synda kúresip júrgender sambo, dzıýdo kúresiniń jigitteri. Basqa sporttan «Qazaqstan Barysyna» qatysyp jatqan eshkim joq. Júldeli oryndar da aınaldyrǵan 10 balýannyń arasynda aınalyp júr.
– Júldeler 10 balýannyń arasynda júrgeni ózgelerdiń osaldyǵyn baıqata ma?
– Bizde sol 10 balýannan asyp túsip jatqan eshkim joq qoı. Bolsa, kimdi aıta alasyz? Degenmen, Beıbit Ystybaev jigittik tanytyp bıyl jarysqa qatyspaı, basqa balýandarǵa jolyn berdi. Sol sııaqty shymkenttik Jumanazar Ersultanov ta sońynan ergen inilerine jol berip, azamattyq tanytty. Osylaı-osylaı jastarǵa jol ashylyp kele jatyr. Qalǵan myqty balýandar bozkilemde áli júr. Bir jaǵynan olardyń júrgeni durys. Jastar sol balýandardy jeńýge tyrysyp, aldaryna bıik maqsat qoıyp keledi. Bylaısha aıtqanda jastarǵa serpin beredi.
– Arman Shoraev bir sózinde «Bolashaqta «Qazaqstan barysyna» irikteýdi reıtıng arqyly ótkizýimiz múmkin» dep edi. Reıtıngpen qatystyrý bizge ne beredi?
– О́tkende Arman Tólegenulymen osy reıtıng týraly aqyldasqanbyz. Meniń oıymsha, bul júıe qazirgi ýaqytta bizge kelmeıtin sııaqty. О́ıtkeni, joǵaryda aıtqanymdaı «Qazaqstan Barysyna» qatysyp jatqan balýandardyń kóbi sambo, dzıýdo kúresinen kelgender dedim ǵoı. Olar reıtıng jınaý úshin mindetti túrde qazaq kúresimen shuǵyldanyp, qazaq kúresinen ótetin týrnırlerge qatysyp, upaı jınaý kerek bolady. Al, myna jaqta olardyń óz sport túrlerinen olımpıada, álem, Azııa chempıonattaryna qatysý kerek bolady. Reıtıng, jınaı almasa «Qazaqstan Barysyna» qatysa almaı qalady. Olar týrnırge qatyspasa, jarys kórigi qyzbaıtyny belgili. Sondyqtan, osy jaıttyń bárin saraptap, aqyldasyp, oılasa otyryp bolashaqtyń enshisine qaldyrdyq. Biraq, túbi osy reıtıngke keletin sııaqtymyz.
– Siz tóreshiler komıtetiniń tóraǵasysyz. Bıylǵy tóreshilik jaǵy qalaı bolady? Keıde beldesýlerden soń jankúıerler arasynda upaıyn bermeı qaldy degen sózder sizderdiń baǵyttaryńyzǵa qaraı aıtylyp jatatyny jasyryn emes...
– Bıyl da tóreshilik jaǵynan alyp bara jatqan asa qatty ózgeris joq. Tek bir jaıt, fınaldyq básekede tóreshiler jańa erejege saı, aldyn ala 200 000 teńge jarna tóleıtin bolady. Jyl basynda búkil respýblıka tóreshilerin jınap, olardan emtıhan alyp iriktedik. Aralarynda súringenderi de boldy. Synnan ótken 12 tóreshini fınaldyq beldesýge daıyndadyq. Biraq, fınalda áli kimder shyǵatyn anyqtalmady. Ony erteń jarys aldynda anyqtaıtyn bolamyz.
– «Qazaqstan Barysynyń» fınalynda tórelik etetinder jarna tólegeni qanshalyqty durys? Nátıje jemisin beredi dep esepteısiz be?
– Árıne, jemisin beredi dep oılaımyz. Fınalda qazylyq etetin tóreshilerdiń ózi óz oblystarynan kelgen balýandarmen bir zalda jattyǵyp, olarǵa bapker bolǵandar. Sol úshin beldesý kezinde óz jaǵyna bura tartpas úshin, ádil tórelik etý úshin olardan 200 myń teńge jarna alyp otyrmyz. Menińshe, ol da az aqsha emes. Eger, kezdesý janjalsyz, talas-tartyssyz ótse, onda sol tóreshige 200 myń teńgesin qaıtaryp, ústine 350 myń teńge syıaqy qosyp beretin bolamyz. Jalpy, óz basym muny durys júıe dep esepteımin.
Áńgimelesken Álı BITО́RE,
«Egemen Qazaqstan»
