Qýanyshy mol qonystoılar

Áý basta qaladan úı satyp ala qo­ıa­r­­lyq jas otbasynyń jınap qoıǵan qar­­­jysy da bolmady. 2012 jyly olar Turǵynúıqurylysjınaq bankinen depozıt ashyp, maq­sat­ty túrde baspanaǵa aqsha jınaı bas­tady.
– Jubaıymyz ekeýmiz aılyq jala­qy­myzdan artylǵan aqshany, depozıtke jı­nadyq. Bala-shaǵanyń tamaǵy, kıimi bar degendeı, aqsha únemdeý ońaı da emes. Biz aldymyzǵa maqsat qoıdyq. Jańa páter bizdiń armanymyz bolatyn. endi, mine, óz baspanamyz bolatynyna sene almaı turmyn. Bir bólme bolsa da, ishi keń, bólmesiniń ózi – 42 sharshy metr. Bizge ázirge jetedi. Endi dostarymyzben, týystarymyzben qonys toıymyzdy toılaıtyn kún de alys emes, qazir úıdi jasaýǵa, jıhaz qaraýǵa kiristik, – deı­di Ǵ.Sholpanbaeva qýanyshyn jasy­ra almaı. 
Sol kúni 70 otbasy dál osyndaı jańa qonys qýanyshyna keneldi. «Nurly jer» baǵdarlamasy aıasynda salynǵan 5 qabatty úı Qostanaı qalasynyń Sovhoz kóshesinde boı túzegen bolatyn. Odan 50 otbasy eki bólmeli, 10 otbasy úsh bólmeli, 10 otbasy bir bólmeli páterdiń kiltin aldy. 
Onyń salynýyna 557 mıllıon teńge jumsaldy. 
– Búginde oblys ortalyǵynda 1 692 páterli 25 úıdiń qurylysy júrip jatyr. Bul qurylysta da «Turǵyn- úıqurylysjınaqbank» aksıonerlik qoǵamy belsendilik tanytady dep bilemiz. Qonys toılaryńyz qutty bolsyn, úılerińiz berekege tolsyn! – dedi baspanaly bolǵan qalalyqtardy qut­tyqtaǵan oblys ákimi Arhımed Muhambetov. 
Jańa úıden qonys tepken tur­ǵyn­dar­dyń barlyǵy da qa­la ákimdiginde bas­pana keze­ginde tur­ǵandar men «Turǵynúıqu­ry­lys­jınaqbankiniń» salymshylary edi. Olarǵa páteriniń bir sharshy metri 117,6 myń teńgeden tústi. «О́z úıim – óleń tósegim» degendeı, óz baspanasyn saryla kútkender Elbasy Nursultan Nazarbaevtyń ekonomıkalyq-áleý­met­tik kemel saıa­satynyń arqasynda osyndaı jeńil­dik­terdi de sezindi. Qýanyshqa qýanysh ústeme bolǵandaı. 

Názıra JÁRIMBETOVA,
«Egemen Qazaqstan»

QOSTANAI