Parlamenttegi «BIýT-Batkıvshına» fraksııasynan depýtat Iýrıı Odarchenko Ýkraına prezıdenti Vıktor Iаnýkovıchti sotqa berdi. Jergilikti aqparat agenttikteriniń habarlaýynsha, depýtat Ýkraına prezıdentin Rodıon Kıreevti sýdıalyqqa zańsyz taǵaıyndaǵany úshin sotqa bergen kórinedi.
Depýtattyń pikirinshe, qazirgi kezde Ýkraınanyń eks-premeri Iýlııa Tımoshenkoǵa qarsy isti qarap jatqan Rodıon Kıreev Kıevtiń Pechersk aýdandyq sotynyń sýdıalyǵyna zańsyz taǵaıyndalǵan. Ol Berezansk aýdandyq sotynan Pechersk aýdandyq sotyna el konstıtýsııasy talaptary men zańnamalaryn óreskel buzý arqyly aýystyrylǵan. Onyń laýazymdyq qyzmetke konkýrs boıynsha taǵaıyndalmaǵany, BAQ-tarda konkýrs týraly resmı aqparattardyń jarııalanbaǵany belgili bolyp otyr. Iýlııa Tımoshenko sýdıa Kıreevti saıası tapsyrysty oryndaýda dep aıyptaǵan.
Stıv Djobspen qoshtasýda
Apple korporasııasynyń negizin qalaǵan Stıv Djobstyń qaıtys bolýyna baılanysty onyń jankúıerleri korporasııanyń Nıý-Iorkten Sıngapýrǵa deıingi dúkenderine kelip, Stıv Djobspen qoshtasýda.
Stıv Djobs ótken sársenbi kúni 56 jastan asqan shaǵynda isik aýrýynan qaıtys bolǵan edi. Ony jaqsy kóretin fanattar kompanııanyń qalalardaǵy dúkenderinde qoıylǵan S.Djobstyń sýretterine bas ıip, gúl shoqtaryn qoıýda. Ol basshy bolyp turǵan kezde kompanııanyń qarjysy 350 mıllıard dollardy quraǵan eken. Mıllıarderdiń áıeli jáne úsh balasy qaldy.
Sarkozıden saıası baspana surady
Grýzııanyń aımaqtyq «Trıaletı» telekompanııasynyń dırektory jáne osy kompanııanyń quryltaıshysy Djondo Nanetashvılı Fransııa prezıdenti Nıkolıa Sarkozıdiń Grýzııaǵa sapary qarsańynda Fransııa basshysynan saıası baspana suraǵan.
Grýzııa buqaralyq aqparat quraldarynyń habarlaýynsha, atalmysh telekompanııa jaqyn óńirlerge ǵana emes, Grýzııanyń barlyq aımaǵyna shynaıy aqparattar taratady. Bul Grýzııanyń bıligine onsha unaı bermeıdi. Sondyqtan bılik telekompanııa basshysyna moraldyq jaǵynan qysym kórsetedi. Telekompanııa basshysy Djondo Nanetashvılıdiń sózine qaraǵanda, osydan bir jyldaı buryn Gorı qalasynyń ortalyq alańynda belgisiz bireýler ony avtokóliginen kúshpen shyǵaryp, soqqyǵa jyqqan kórinedi.
Veto quqyǵyn paıdalandy
Reseı men Qytaı BUU-nyń turaqty múshesi retinde NATO kúshteriniń Sırııadaǵy operasııalardy ári qaraı jalǵastyrýǵa baılanysty BUU Qaýipsizdik Keńesi qararynyń jobasyna veto qoıdy. Bul AQSh tarapyn qanaǵattandyrǵan joq.
AQSh-tyń Memlekettik hatshysy H.Klıntonnyń málimdeýinshe, Qytaı men Reseı BUU Qaýipsizdik Keńesiniń Bashar Asadtyń rejimine qarsy qarar jobasyna veto qoıýy bul elderdiń Sırııa halqyna qatysty jaýapkershilikten bas tartýy bolyp sanalady. Budan bir kún buryn AQSh-tyń BUU janyndaǵy turaqty ókili Sıýzan Raıs: «Birqatar elder Sırııadaǵy jaǵdaıdyń turaqtanýyna múddelilik tanytpaıdy. Bul óńirdegi qaýipsizdikke qater tóndiredi», degen maǵynada pikir bildirgen bolatyn. О́z kezeginde Reseıdiń BUU janyndaǵy turaqty ókili Vıtalıı Chýrkın Reseı bul máselede prınsıpti kózqaras ustanady degen edi.
Saılaýǵa qatysýdan bas tartty
AQSh-tyń vıse-prezıdenttiginen burynǵy úmitker Sara Peılın 2012 jyly AQSh prezıdenttik saılaýyna qatyspaıtyndyǵyn málimdedi. Reıter agenttiginiń taratqan aqparattaryna qaraǵanda, bul – onyń uzaq oılanǵandyǵynan keıingi sheshimi.
2008 jyly ótken prezıdenttik saılaýda respýblıkashyl senator Djon Makkeın prezıdenttik saılaýǵa túsken bolatyn. Al ol kezde Sara Peılın Alıaskanyń gýbernatory edi. Áleýmettik suraý salý nátıjesi kórsetkendeı, qazirgi kezde AQSh prezıdenttiginen úmitkerler arasynda Massachýsets shtatynyń eks-gýbernatory Mıtt Romın, bıznesmen Herman Keın jáne Tehas gýbernatory Rık Perrı alda keledi. Bul úsheýi de respýblıkashyl partııanyń músheleri bolyp tabylady.
Operasııany toqtatpaýdy qalaıdy
NATO áskerıleri Kaddafı kúshteri qarýly qaqtyǵysty tolyq toqtatpaıynsha, Lıvııada áskerı operasııalardy jalǵastyra beredi.
Ýaqytsha ulttyq keńestiń pikirinshe, NATO-ǵa múshe memleketter qorǵanys mınıstrleriniń kezdesýinde bul másele qaralýy tıis. Qazirgi kezde el aýmaǵynyń basym kópshiligi kóterilisshilerdiń baqylaýyna ótken. Onyń ishinde Kaddafıdiń týǵan qalasy Sırt te bar. Degenmen, Kaddafıdiń jaqtastary qarsylyqty áli de toqtatpaı keledi. Keıbir aqparat kózderiniń aqparatyna qaraǵanda, Sırt qalasynda medısınalyq dári-dármekter, aýyz sý, azyq-túlik jáne otyn jetispeıdi. Qalanyń beıbit turǵyndary basqa aýmaqtarda bas saýǵalaýǵa májbúr.
Qysqa qaıyryp aıtqanda:
*Kabýl qalasynyń 300-ge tarta turǵyny AQSh pen NATO kúshteriniń Aýǵanstandaǵy áskerı qımyldaryna qarsylyq retinde sherýge shyqty. Olardyń talaby – elden áskerılerdi áketý. *IýNESKO keńesi BUU-ǵa múshe 193 eldi Palestına máselesine qatysty daýys berýge ruqsat etti. Reıter agenttiginiń keltirgen aqparattary boıynsha, buǵan AQSh bastaǵan birqatar el veto qoıýy múmkin. *Reseı AQSh-tyń zymyranǵa qarsy qorǵanys júıelerin Eýropaǵa qaraı keńeıtý áreketine alańdaýshylyǵyn bildirdi. Bul osy máselege baılanysty qol jetkizilgen ýaǵdalastyqqa nuqsan keltiredi, deıdi Reseı taraby. Internet materıaldary negizinde ázirlendi.
