Kezdesý el bolashaǵy, jastardyń róli jáne azamattardyń ómirin aıqyndaıtyn negizgi qaǵıdattar týraly ashyq pikir almasý alańyna aınaldy. Jastar usynylyp otyrǵan bastamalardyń progressıvti ári ınnovasııalyq sıpatyn atap ótip, olardyń quqyqtaryn qorǵaýdy kúsheıtetinine senim bildirdi.
Jıynǵa Qaraǵandy oblysynyń ákimi Ermaǵanbet Bólekpaev, Konstıtýsııalyq komıssııa músheleri Nurken Kobjanov pen Bekzat Altynbekov qatysty.
О́z sózinde óńir basshysy jańa Konstıtýsııany qabyldaý – tek quqyqtyq qujatty jańartý emes, tehnologııalyq revolıýsııa jaǵdaıynda memlekettilikti nyǵaıtýǵa baǵyttalǵan strategııalyq qadam ekenin atap ótti.
«Jańa Konstıtýsııany qabyldaý boıynsha búkilhalyqtyq referendým ótkizý – mańyzdy ári tarıhı sheshim. Bul jekelegen normalardy túzetý ǵana emes, zamanaýı syn-qaterlerge jaýap beretin memlekettik qurylymnyń jańartylǵan modelin qalyptastyrý. Biz bul sheshimge aýqymdy saıası reformalardy kezeń-kezeńimen júzege asyra otyryp keldik. Jańa Konstıtýsııa birlik, ádildik jáne zań ústemdigi qaǵıdattaryn saqtaı otyryp, jeke tulǵany qorǵaýdy kúsheıtedi – kinásizdik prezýmpsııasyn, jeke bostandyqtardy jáne advokattyń rólin naqty bekitedi. Búgin biz bolashaq ómirimizdiń negizin aıqyndap otyrmyz, sondyqtan durys tańdaý jasaý mańyzdy», dedi Ermaǵanbet Bólekpaev.
Oblys ákimi 2019 jyldan bastaý alǵan jáne qoǵamdyq, memlekettik ári ekonomıkalyq júıeni jańǵyrtýǵa baǵyttalǵan reformalardyń hronologııasyna toqtalyp, olardyń zańdy jalǵasy retinde jańa Konstıtýsııa usynylyp otyrǵanyn jetkizdi. Sonymen qatar reformalardy júzege asyrýdaǵy jáne Qazaqstannyń bolashaǵyn qalyptastyrýdaǵy jastardyń róline erekshe mán berdi.
Konstıtýsııalyq komıssııa músheleri Nurken Kobjanov pen Bekzat Altynbekov komıssııa quramyndaǵy jumys tájirıbelerimen bólisip, konstıtýsııalyq reformany ázirleý barysynda qoǵamdyq qatysýdyń mańyzyn atap ótti.
«Taldaý Qaraǵandy» óńirlik analıtıka mektebiniń qatysýshysy Asyljan Tólegenov ekologııalyq qaǵıdattardy konstıtýsııalyq deńgeıde bekitýdiń mańyzdylyǵyna toqtaldy.
«Jańa Konstıtýsııa jobasynda ekologııalyq máseleler ornyqty damý qaǵıdattary arqyly kórinis tapqan. Munda «Taza Qazaqstan» tujyrymdamasynyń logıkalyq jalǵastyǵy baıqalady. Ekologııa – bul tek jekelegen ekologııalyq zańnama máseleleri emes, qorshaǵan orta men tabıǵı resýrstarǵa degen kózqarasymyz. Jobany ázirleý barysynda qoǵam tarapynan joǵary belsendilik boldy. Bul qujatty biz, qazaqstandyqtar, ózimiz úshin jazdyq», dedi Asyljan Tólegenov.
Oblystyq Jastar isi jónindegi keńestiń múshesi Janbota Elýbaev Konstıtýsııanyń zııatkerlik menshikti qorǵaýdaǵy jáne jastardyń shyǵarmashylyq áleýetin damytýdaǵy róline toqtaldy.
«Ult qazyna» jobasynyń mentory Saltanat Qaıyrbek konstıtýsııalyq reforma adamı kapıtal men kreatıvti salany damytýǵa jańa múmkindikter ashatynyn atap ótti.
«Konstıtýsııalyq reforma – bul jańa múmkindiktermen qatar ınstıtýttardyń jaýapkershiligin arttyrý. Úshinshi bapta adamı kapıtal memlekettiń negizi ekeni aıqyn kórsetilgen. Demek, ǵylymdy, bilimdi jáne mádenıetti damytýǵa aıryqsha mán beriledi. Bizdiń óńirde mádenı is-sharalar formatynan mádenı óndiris pen kreatıvti ındýstrııany damytýǵa kóshý baǵytynda jańa bastamalar júzege asyrylýda. Bul – jańa Konstıtýsııa talaptaryna saı keletin ýaqtyly qadam», dedi ol.
Kezdesý barysynda qatysýshylar konstıtýsııalyq reformalardyń negizgi baǵyttaryn talqylap, pikir almasty jáne ózderin tolǵandyrǵan suraqtaryn qoıdy.
