«Almaty» voleıbol klýbynyń jetekshisi Jandos Jıenbaev atalmysh klýb 2008 jyly qurylyp, bastapqyda «Áıelder voleıbol klýby» MQK» dep atalǵanyn, 2013 jyly «Almaty» voleıbol klýby» bolyp ózgergenin aıta kele: «Ulttyq jáne joǵarǵy lıga oıynshylarynyń birigýi, voleıboldyń qarqyndy damýyna óz septigin tıgizdi. Osyndaı sheshimnen soń, qarjylandyrý tolyq ótelip, klýb jaqsy nátıjelerge qol jetkizdi. Eki ujym birikkeli beri, biz elimizdiń úzdik voleıbolshylaryn qyzyqtyra bastadyq. Bular Qazaqstan quramasynyń negizin qalap otyr. Erler komandasy da osyndaı ózgeristerge ushyrady. Nátıjesinde, voleıboldan áıelder ujymy Qazaqstan Kýbogynda kúmispen kúptelse, erler komandasy eki jyl qatarynan Qazaqstan chempıony atandy. Bul jetistikterge Almaty qalasy deneshynyqtyrý jáne sport basqarmasynyń qoldaýy arqasynda jettik. Erler voleıbol komandasyna kelsek, olar osy kúnde elimizdiń jeti dúrkin chempıony. Menińshe, bul jerde KSRO-nyń eńbek sińirgen jattyqtyrýshysy Gennadıı Parshın men Gılıazýtdınovtiń jáne Tkachenkolardyń eńbegin atap ótken jón. Sol sııaqty, erler komandasy oıynshylarynyń 70 paıyzy men áıelder ujymynyń 50 paıyzy ulttyq qurama komandasynyń músheleri bolǵan. Búgingi tańda erler komandasynyń demeýshileri basqa. Al biz «Almaty» áıelder klýby» ataýymen eki áıelder komandalaryn damytý úshin aıanbaı eńbek etýdemiz», dedi.
Endigi jerde klýbtyń basty kózdegen maqsaty – el voleıbolyn legıonerlersiz damytý bolyp otyr.
– Árıne, legıonerler degen jaqsy, biz qarsy emespiz. О́ıtkeni, olar álem deńgeıindegi úzdik sportshylar. Sheteldik sportshylardyń bizge aýysýy jalpy ujymǵa jaqsy áser etedi. Bizdiń qyzdar olarmen birge jattyǵyp, oıyn sheberlikterin arttyrady. Alaıda, biz óz kúshimizge senemiz, – deıdi Jandos Jıenbaev.
Qazirgi tańda klýbtardyń kóbisi sheteldik oıynshylardy, sonymen qatar, elimizdiń úzdik voleıbolshylaryn óz qaramaǵyna alyp otyrǵany aıan. Máselen, «Altaı» men «Jetisý» klýbtarynyń quramynda myqty áýe dop arýlary oınaıdy. Onyń ishinde «Almaty» klýbynyń tárbıelenýshileri bar. Bular – Sana Anarqulova jáne Inna Matveeva.
«Almaty» voleıbol klýby oıynshylarynyń qazirgi ortasha jas shamasy 20-24 jas aralyǵynda. Klýbtyń úsh voleıbolshysy Qazaqstan quramasynyń sapynda óner kórsetedi. Olar –Lıýdmıla Isaeva, Iаna Petrenko jáne Tatıana Fendrıkova
Sonymen kil daryndarymen daralanǵan klýb kelesi maýsymǵa daıyndyqqa kiristi. Aldaǵy maýsym kúzde bastalyp, kóktemde aıaqtalady.
Aınash ESALI,
«Egemen Qazaqstan»
ALMATY
