Iraktyń senimdi ókili óziniń kirispe sózinde Mosýl qalasyn azat etýdiń mańyzdylyǵyna toqtaldy.
«Biz búkil álem halyqtary atynan kúresip, eldiń tynyshtyǵyna qaýip tóndirgen asa qaýipti terrorıstik toptyń kózin joıdyq. «Islam memleketi» dep aıdar taqqan sodyrlardyń tamyryna balta shaptyq. Bizdiń órenderimiz shahardy azat etý jolynda óz ómirlerin qıyp, Iraktyń tarıhy mol, órkenıetti el ekenin dáleldedi. Bul – bizdiń ǵana emes, búkil adamzattyń jeńisi», – deıdi Iýnýs Salım.
Iraktyń Qazaqstandaǵy senimdi ókiliniń aıtýynsha, azat etý operasııasy kezinde eń áýeli sodyrlar tiri qalqan retinde qoldanǵan azamattardyń qaýipsizdigi eskerilgen. Sondaı-aq, Iýnýs Salım bosatý sharasy kezinde odaqtas elderdiń de mańyzdy ról oınaǵanyn aıta ketti. Onyń pikirinshe, Iraktaǵy úlkendigi hám mańyzdylyǵy jóninen ekinshi orynda turatyn shahardy terrorısterden tartyp alý – ILIM-niń birjola joıylǵanynyń aıǵaǵy.
Áıtse de, Irak áskeri sodyrlardyń shahardaǵy kóne jádigerlerdi qıratýyna toqtaý sala alǵan joq. Máselen, sodyrlar XII ǵasyrda salynǵan án-Nýrı meshitin talqandap ketti. Iýnýs Salım Mosýlda qıraǵan tarıhı nysandardyń kóp ekenin, ony qaıta qalpyna keltirý úshin Irak halqy baryn salatynyn málimdedi.
«Qadimun Ya Nayawa» dep atalatyn Mosýldy bosatý operasııasy 9 aı buryn bastalǵan edi. Atalǵan áskerı qımylǵa Irak áskeri, antıterrorlyq kúshter, federaldy polısııa, halyqtyq eriktiler sekildi túrli qarýly kúshter qatysty. Osy merzim aralyǵynda koalısııa kómegimen Irak qarýly kúshteri 16 myńnan astam sodyrdyń kózin joıǵan. Sondaı-aq, 70-ke jýyq jarylǵysh kólik pen 6 myńnan astam jarylǵysh zat zalalsyzdandyrylǵan bolatyn. Esterińizde bolsa, DAISh sodyrlary Mosýl qalasyn 2014 jyldyń ortasyna taman basyp alyp, «Islam memleketiniń» qurylǵanyn jarııalaǵan-dy.
Foto:reuters.com
Abaı ASANKELDIULY,
«Egemen Qazaqstan»
