Ulttyq mereke ortalyq alańdaǵy sahnalyq sharadan bastaldy. Onda Qazaqstannyń Investısııalar jáne damý vıse-mınıstri Erlan Haıyrov eki memlekettiń tyǵyz ekonomıkalyq jáne dostyq qarym-qatynastarynyń arqasynda elimizde Ońtústik Koreıanyń 400-ge jýyq kompanııasymen birlesken 40-qa jýyq jobanyń iske asyp jatqanyn atap ótti. Qazaqstanda kóp jyldardan beri «KIA» jáne «Hyundai» sııaqty Koreıa kompanııalarynyń ónimderi úlken suranysqa ıe. «Qazaqstanda 100 myńnan asa etnıkalyq koreıler turady. Sondyqtan, eki ult arasyndaǵy qalyptasqan baýyrmaldyq men dostyq qasıet tarıhtan kele jatqan qubylys deýge bolady. Qazaqstan Koreıanyń tájirıbesin belsendi túrde qoldanyp keledi. Qazirgi tańda túrli bilim berý baǵdarlamalarynyń arqasynda kóptegen stýdentter sapaly joǵary bilim alyp kelýde. Búgingi tańda «Tańǵy shyq eli» álemdegi eń energotıimdi elderdiń biri bolyp tabylady», dedi vıse-mınıstr.
Koreıalyq taraptan sóz sóılegen Saýda, óndiris jáne energetıka mınıstrliginiń turaqty komıssary Kım Eng Sam dıplomatııalyq qatynas arqasynda ınvestısııa birneshe esege artqanyn tilge tıek etti. Komıssar óz sózinde Koreıa pavılonyn tamashalaǵandar sany 150 myńnan asatynyn da áńgimeledi.
«Qazaqstan – Koreıa Respýblıkasynan Ortalyq Azııaǵa eń aýqymdy ınvestısııa tartqan memleket. 1992 jyly bizdiń elimizden Qazaqstanǵa salynǵan ınvestısııa kólemi 21 mln AQSh dollaryn qurasa, qazirgi ýaqytta bul kórsetkish 3,78 mlrd dollarǵa jetti. Aıta keterligi, sońǵy ýaqytta Koreıa Respýblıkasyna saıahattaıtyn qazaqstandyqtardyń sany 30 paıyzǵa artqan», dedi Kım Eng Sam.
Ulttyq kúndi merekeleý baǵdarlamasynyń resmı bóliginen keıin, kórmege kelýshilerdi koreıalyq tanymal «B-Boy» tobynyń bıshileri, sondaı-aq, «K-pop» jáne «Sorea Band» tobynyń qyzdary qýanyshqa bóledi. Sonymen qatar, sahnada koreı dástúrli jekpe-jek óneri – taekvondodan shoý kórsetildi. Qonaqtar men jýrnalıster úshin tanymal ártis So Kan Djýnnyń qatysýymen fan mıtıng uıymdastyryldy.
Ashat Raıqul,
"Egemen Qazaqstan"
Sýretti túsirgen Orynbaı Balmurat,
"Egemen Qazaqstan"
