Slovakııa pavılonynda kópshilikti tańǵaldyrǵan dúnıelerdiń biri – kádýilgi velosıped. Onyń basqyshtaryn basyp, qýat kózin óndirýge bolady. «Aqyldy úı» odan da keremet. Jel men kúnniń arqasynda qýatpen qamtylyp, sýmen jáne jaryqpen jaraqtalady. Saıahatqa shyqqanǵa óte yńǵaıly ekokapsýla 40 gradýs sýyqqa, 50 gradýs ystyqqa tózimdi eken. baǵasy 100 myń AQSh dollaryn shamalaıdy. Qymbat bolsa da, az ýaqytta 50 danasy saýdalanyp úlgergen. Demek, az da bolsa, suranys bar.
«Búginde biz energetıkalyq tıimdilik pen qaýipsizdikke basa nazar aýdaryp otyrmyz. Slovakııada tabıǵı resýrstar tapshy. Eýroodaqtyń ózi energııany Reseı, Norvegııa men Aljır elderinen satyp alyp, ol úshin kúnine 1 mln eýro jumsaıdy. Biz astyq, júgeri sekildi bıomassadan qýat kózin óndirýdi qolǵa alyp otyrmyz. Búginde Slovakııada balamaly energııanyń úlesi – 14 paıyz. Endigi mindet 2020 jylǵa deıin bul kórsetkishti 20 paıyzǵa jetkizý», deıdi Slovakııa balamaly energııa qaýymdastyǵynyń prezıdenti Fılıp Ýrban.
Slovakııa kórmege ulttyq oıýlarmen órnektelgen toqyma ónimderin de qoıypty. Halqy eńbekqor, qolónermen aınalysady. Pavılonda sheberler qysh ydys jasap otyr. IýNESKO tizimine engen jalǵyz mýzykalyq aspaptary – fýıarany da ákelipti. «Fýıara – bizdiń ulttyq aspabymyz. Ol úıeńkiden kesip, pishilip jasalady. Bes jyl keptirý kerek, sodan keıin ǵana aspap oıýǵa jaraıdy. Úıde jasap, 600 eýrodan satamyn» – deıdi, ánshi Straka Lýbosh.
Ashat Raıqul,
"Egemen Qazaqstan"
Sýretti túsirgen Orynbaı Balmurat,
"Egemen Qazaqstan"
