Kópshilik nazaryn «Astana» konsert zalyndaǵy Atyraý oblystyq tarıhı-ólketaný mýzeıiniń kórmesi erekshe aýdardy. Mýzeıdiń bólim meńgerýshisi Oksana Áljanovanyń aıtýynsha, Astanaǵa 700-den astam ár túrli jádiger ákelingen. Qundy dúnıeler qatarynda Jyloı aýdanyndaǵy Araltóbe qorǵanyn qazý kezinde ekinshi «Altyn adamnyń» qabirinen tabylǵan qola qanjar men qaıraq tas bar. Kúı anasy Dına Nurpeıisovanyń 1954 jyly sońǵy ret konsertke qatysqan kezinde taqqan kúmis belbeýi de kórmeniń kórkin keltirip tur.
– Mýzeı jádigerleriniń arasynda qoldan jasalǵan dombyra bar. Bir ereksheligi, ony daıyndaýǵa maldyń súıegi men taza kúmis paıdalanylǵan. Mýzeıge ony Mahambet aýdanynyń turǵyndary Lekerovter otbasy tabystady. Dombyrany 1906 jyly arǵy atalary óz qolymen jasaǵan eken, – deıdi Oksana Áljanova.
Mahambet aýdanyndaǵy Saraıshyq eski shaharynyń ornyna qazba jumystary kezinde tabylǵan jádigerler aıryqsha nazar aýdartady. Mysal retinde, XIII ǵasyrǵa jatatyn jyltyr qytaı farforynan jasalǵan ydysty aıtýǵa bolady. Mundaı qysh ydystar dáýletti adamdardyń arasynda úlken suranysqa ıe bolǵan, eger ý quıatyn bolsa, ydys túsin ózgertedi eken.
Kóne qala ornynan tabylǵan jádigerler arasynan ıttiń izi bar kirpishti kórýge bolady. Mýzeı qyzmetkeriniń aıtýynsha, ertede úıdiń irgetasyna ıttiń izi bederlengen kirpishti qoısa, ol shańyraq baqyt pen baılyqtyń ordasyna aınalady dep sengen.
Baqytgúl BABASh,
«Egemen Qazaqstan»
Sýretti túsirgen
Raqym QOILYBAEV
