Ákeli-balaly Qarjaýbaevtar úndiniń taýysyn, qytaıdyń qyrǵaýylyn, afrıkanyń túıequsyn jáne úı qustaryn baǵýǵa bilek sybana kiristi. Boılary 2,5 metr, salmaǵy 120-140 kg, tek etiniń ózi 40-45 kg tartatyn afrıkalyq túıequstardyń jumyrtqasy aqýyzǵa baı, ıaǵnı shamamen 16 adamdy erkin toıdyrady. Saǵatyna 70 km baǵyndyratyn bul qustardyń terisinen túrli áshekeı buıymdar, aıaq kıim, kıim-keshek ázirlenedi. Mańǵystaýǵa ákelingenine bir jyldan asqan olar óńirdi jatsynbaı, tez jersinip ketken. Sharýashylyqta qyrǵaýyldyń 10-ǵa tarta túri bar, qustarǵa óz erekshelikterine qaraı arnaıy oryndar jasalǵan. Úırek-qazdarǵa haýyz salsa, bódenelerdi belgili bir temperatýra saqtalǵan ǵımaratta ustaıdy. Bódenelerden táýligine 800-ge deıin jumyrtqa alyp, saýdaǵa shyǵarsa, al úırek-qaz ónimderin naryqqa shyǵarýdy kelesi jyldan bastaýdy kózdep otyr.
Syrttan ákelingen jumyrtqalardy ınkýbatorda kóbeıtetin olar halyqqa sapaly ónim berý úshin olardy qunarly jem-shóp túrlerimen qorektendiredi. Memleket tarapynan sýbsıdııamen kómek te alypty. Aldaǵy ýaqytta qus sanyn jáne túrlerin kóbeıtip, sharýashylyq ornalasqan jerden qus baǵyn ashyp, etnoaýyl turǵyzý arqyly óńirde agro jáne ekotýrızmdi damytýǵa óz úlesterin qospaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
