– Bizde árbir ekinshi mekteptiń shatyry eskirip ketken, – dedi bilim bóliminiń bastyǵy Natalııa Fesenko. – Sondyqtan da qaı mektepti qalaı jóndeý kerektigin dırektorlar jıynynda anyqtap otyramyz. Bir ókinishtisi, jyl saıyn bıýdjet qorjyny ulǵaısa da, bilim ordalaryn qalpyna keltirýge, jańa oqý jylyna daıyndaýǵa aqsha az bólinedi. Osy jaǵy túsiniksiz.
Semeıde kóptegen mektepter ózderiniń kezegin kútýge májbúr. Basym kópshiliginiń jóndeý kórmegenine 50-60, 90 jyldaı bolǵan. Olar shatyryn jóndeýdi jyldap kútýge shamalary jete me, joq pa, ol jaǵy belgisiz. Máselen, bıyl №35 mektepte ylǵal saldarynan bir synyptyń tóbesi qulap túsipti. №28 mektepte tóbe men qabyrǵasy kógerip, zeń basyp ketken. Sondyqtan da, shaǵyn sportzaldy jaýyp tastaýǵa májbúr bolǵan. Bul jerde buryndary bastaýysh synyp oqýshylary jattyqqan eken.
– Balalardyń densaýlyǵy úshin tutynýshylar quqyǵyn qorǵaý basqarmasynyń mamandary zeńnen kógerip ketken mektepterge balalardy kirgizýge tyıym saldy. Bul durys. Biz bilim ordalarynyń basshylaryna demeýshilermen jumys isteýdi tapsyryp otyrmyz. Qoǵamdyq jáne halyqaralyq uıymdarmen birlese jumys isteńder dep jatyrmyz. Japonııalyq «Shóp tamyry» atty joba boıynsha qaladaǵy keıbir mektepter eski terezelerin plastıkke aıyrbastap aldy. Al aýyldaǵy birneshe mektepter Japonııa elshiligine jobalaryn usyndy. Jáne ata-analar birlestigimen de jumys isteý kerek, – dedi Natalııa Fesenko.
Aldaǵy ýaqyttarda mektepterde demeýshiler atyndaǵy kabınet ashylmaq. Bul olardy qarjylyq jaǵynan tartýǵa arnalǵan sharanyń biri bolsa kerek. Kásipker atyndaǵy qaıyrymdylyq bólmesi qala mektepteriniń birinde ashylǵan da eken. Desek te, munyń durys-burystyǵyn aldaǵy ýaqyt kórseter. Al ázirshe Semeı mektepterin jóndeýge qosymsha qarjy kózi jetpeı jatyr. Bul máseleni arnaıy sheshý úshin oblysqa ótinish jazdyq, jaýabyn tosyp otyrmyz, deıdi Natalııa Fesenko.
Raýshan NUǴMANBEK
Semeı
Sýretti túsirgen avtor
