QR Bilim jáne ǵylym mınıstrligi Balalardyń quqyqtaryn qorǵaý komıteti ádette jańa oqý jylynyń bastalýyna bir aı qalǵanda «Mektepke jol» jalpyrespýblıkalyq qaıyrymdylyq aksııasyn ótkizedi. Onynshy jyl qatarynan uıymdastyrylyp kele jatqan aksııa bıyl 2017 jylǵy 1 tamyzdan 30 qyrkúıekke deıingi kezeńde «Meniń tańdaýym – balalarǵa kómek kórsetý!» uranymen ótedi. 2 aılyq is-sharanyń maqsaty – az qamtylǵan jáne kóp balaly otbasylar, jetim balalar men ata-anasynyń qamqorlyǵynsyz qalǵan balalarǵa kómek kórsetý.
«Qazirgi tańda jergilikti atqarýshy organdar 300 myńǵa jýyq oqýshynyń tizimin jasaqtady. Olarǵa kómek mektep pen bilim bólimderi arqyly kórsetiledi. Bul kórsetkish 300 myńmen shektelip qalmaıdy. Eger muqtaj ata-analar bolsa, olar kez kelgen ýaqytta óz mektebi men bilim bólimine habarlasyp, balalardy tizimge engizip, kómek ala alady», - dedi Ysqaq Qulataı.
Al QR BǴM Balalardyń quqyqtaryn qorǵaý komıteti tóraǵasynyń orynbasary Mánshúk Ábdikárim ótken jyly 320 myńǵa jýyq oqýshy 2 mlrd 468 mln 785 teńge kóleminde kómekke ıe bolǵanyn aıtty.
«Byltyr materıaldyq kómekpen qamtylǵan muqtaj balalar sany boıynsha Jambyl, Qaraǵandy, Qyzylorda, Aqtóbe oblystary kósh bastady. Bul óńirlerde 30 myńnan astam bala «Mektepke jol» aksııasyna qatysty. Al tartylǵan qarjy boıynsha kósh basynda Almaty, Qaraǵandy, Jambyl, Ońtústik Qazaqstan oblystary boldy. Bul aımaqtarda ár óńirge tartylǵan qarjy kólemi 500 mln teńgeden asty. Qol ushyn bergen azamattardyń arqasynda byltyr barlyǵy 300 myńnan astam oqýshy qajetti quraldarmen mektepke bardy», - deıdi Mánshúk Ábdikárim.
Aıta keteıik, kómekke muqtaj otbasylar men olarǵa qoldaý kórsetkisi keletin azamattar Balalardyń quqyqtaryn qorǵaý komıtetine 8-7172-74-21-40 nemese komıtettiń qaýyrt jelisine 74-25-28, sondaı-aq, oblystardyń, Astana jáne Almaty qalalarynyń bilim basqarmalaryna habarlasa alady.
