Ol kórme alańyn aldymen Qazaqstan pavılonynan bastady. Plasıdo Domıngo eń birinshi qurmetti qonaqtarǵa arnalǵan kitapqa jyly lebizderin jazyp, qoltańbasyn qaldyrdy. Osydan keıin "Nur Álem" ishindegi "Qazaqstannyń qonaqjaılylyǵy" taqtaıshasyna kóz júgirtti. Munda ol "qonaqasy", "aýyz tııý", "qonaqkáde", "at mingizip, shapan jabý", "sarqyt", "bel kóterer" sekildi ultymyzdyń salt-dástúrimen qysqasha tanysyp ótti. Qazaq xalqynyń osyndaı darxan minezine, salt-dástúrine degen tańdanysyn jasyra almaǵan ánshi eriksiz "fantastic" deýmen ǵana boldy.
Al ertegide aıtylatyn Samuryq qustyń jumyrtqasy ornalasqan alyp aǵashtyń maketine kelgende "Báıterek" ǵımaratynyń syryna ishteı qanyq boldy.
«Astanaǵa osymen ekinshi ret kelip otyrmyn. Alǵash kelgenimnen-aq qazaq xalqynyń qonaqjaılylyǵyn sezindim. "Nur Álem" pavılonyn aralaǵanymnan keıin qazaq ultynyń darxan kóńildi mineziniń, syryn uqqandaı boldym. Al EKSPO-dan alǵan áserimdi sózben aıtyp jetkize almaımyn. Beıne bir ózge álemge nemese bolashaqqa enip ketkendeı kúıde qalyp otyrmyn. Osyǵan deıin talaı kórmege qatystym, konsertterimdi ótkizdim. Biraq bul EKSPO olardan erekshe», dedi opera ánshisi.
«Nur Álem» pavılonynan shyǵar aldynda ol fontanǵa tıyn laqtyryp, ishteı tilek tiledi. Al ózimen birge erip kelgen nemeresi eń joǵarǵy qabatta ornalasqan shyny edenniń unaǵanyn aıtty. EKSPO aýmaǵynda taǵy da Avstrııa, Germanııa, sondaı-aq týǵan eli Ispanııanyń pavılondaryn aralap shyqty.
«Birer kún buryn ǵana elordamyzda Plasıdo Domıngonyń «Operalııa» konkýrsy ótti. Ol EKSPO-nyń kórkine kórik bergendeı boldy. Búgin otbasymen birge keshen aýmaǵyna kelip otyr. Mundaı álemge tanymal tulǵalardyń jyly lebizin bildirýi biz úshin úlken qýanysh», dedi Mádenıet jáne sport mınıstri Arystanbek Muhammedıuly.
Aıta keteıik, Plasıdo Domıngo Astanaǵa birer apta buryn kelgen bolatyn. Búginge deıin onyń dúnıe júzine belgili «Operalııa» baıqaýy uıymdastyryldy. Osyǵan oraı elordadaǵy «Opera jáne balet» teatry ǵımaratynda ánshiniń qatysýymen arnaıy baspasóz-konferensııasy uıymdastyrylǵan bolatyn. Ol eń birinshi Qazaqstan astanasyna toǵyz jyl buryn kelgenin, osy ýaqyt aralyǵynda bas qalanyń adam tanymastaı ózgerip ketkenin málimdedi.
Onyń aıtýynsha, «Operalııa» baıqaýy arqyly qatysýshylardyń óneri alǵa jyljyp, álemge tanyla bastaıdy. О́z sózinde ol «Operalııanyń eń alǵashqy, ıaǵnı 1993 jylǵy jeńimpazy shvesııalyq Nına Shtemendi mysalǵa keltirgen bolatyn. Sonymen qatar, ol «Operalııaǵa» qatysýshylardyń bilimin shyńdaý úshin árkez kómek berip turatynyn aıtqan. Al Astanada ótken báıgege álemniń 17 elinen 40 daryndy ánshi qatysty.
Bul synǵa Qazaqstan atynan «Astan Operanyń» solısi, birneshe halyqaralyq baıqaýlardyń jeńimpazy Marııa Mýdrıak, sondaı-aq, Rasýl Jarmaǵanbetov, Damır Sádýaqasov, Stanıslav Lı qatysqan bolatyn. Al aqtyq básekege Marııa Mýdrıak joldama aldy. Qazylar alqasy men kórermenderdiń daýys berýi qorytyndysy boıynsha otandasymyz úshinshi orynǵa ıe bolǵan edi.
Aıan ÁBDÝÁLI,
"Egemen Qazaqstan"
