Qazir medıatorlardyń kómegine júginip, kúrmeýi qıyn bolǵan isinde eki tarapty da rıza eter oń sheshimge qol jetkizip júrgender joq emes.
Taraptardy tatýlastyrýdyń ońtaıly joly sanalatyn medıasııa ádisi joǵary baǵalanyp, 5 tamyz elimiz boıynsha medıatorlar kúni bolyp belgilengen edi. Atalmysh merekeni Mańǵystaý oblysynyń Qazaqstan halqy Assambleıasy, «Qoǵamdyq kelisim» KMM janynan arnaıy ashylǵannan beri óz jumysyn turaqty jáne jemisti júrgizip kele jatqan Medıasııa kabıneti de atap ótti. Merekege oraı Aqtaýdaǵy Dostyq úıinde «Ashyq esik» kúni ótti. «Ashyq esik» kúnin toqsan saıyn ótkizip, alýan isterdiń oń sheshilýine, sondaı-aq aıtary bar turǵyndardyń talap-tilegin tyńdaýǵa otyratyn kásibı medıatorlar bul kúni de iske belsene kiristi.
«Ashyq esik» kúni Aqtaýdaǵy «Medıasııany damytý ortalyǵy» RQB kəsibı medıatorlary A.Imanqulova, N.Sydyqova, M.Nurjanov, A.Qadyrov S.Nábıev jáne Q.Amanjol kezekshilik etip, qala turǵyndaryna tegin keńester berdi.
Ashyq esik kúni turǵyndardyń ótinishteri nemese basqa da medıasııalyq prosedýralar tegin júrgizilip, buzaqylyq, urlyq, qyzmetin asyra paıdalaný, alıment óndirý, qaryz aqsha óndirý, ajyrasý daýlary boıynsha medıasııalyq kelisimge birneshe aryz qabyldandy.
– Medıasııa kabınetine halyqtyń suranysy, qyzǵýshylyǵy joǵary. Kelýshilerdiń talǵamyna saı qyzmet etý – medıatorlardyń da basty maqsaty. Sondyqtan, olar da óz kásibı biliktiligin udaıy jetildirip, kýrstar men semınarlarda shyńdalyp otyrady, ózge is-tájirıbelermen birge, halqymyzdyń sheshendik sózderin oqyp, bıler taǵylymyna sýsyndaıdy. Qıyn isterde ekijaqty kelisimge kelip, ortaq daýlarǵa oń sheshimder taýyp, tatýlasyp jatqandar da az emes, deıdi «Qoǵamdyq kelisim» mekemesi dırektory A.Jaıylhanova.
«Aǵaıyn tatý bolsa, as kóp» deıdi halyq taǵylymy. Berekeli, merekeli ómir súrý – árbir adam úshin basty qajettilik.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
